Koreya Namanganda temiryo‘l terminali qurishni rejalashtirmoqda

Namangan viloyati hokimi Shavkat Abdurazzoqov Janubiy Koreyaning Ecofarm Global Co. kompaniyasi rahbari Lim Sang Hva bilan uchrashuv o‘tkazdi. 

Uchrashuv davomida kompaniya tomonidan amalga oshirilishi rejalashtirilgan ikki yirik loyiha muhokama qilindi.

Birinchi loyiha Namangan—Toshkent yo‘nalishida zamonaviy Karvonsaroy, savdo markazi, restoran, dam olish maskani va avtoturargoh barpo etishni o‘z ichiga oladi. Loyiha Chust tumanidagi “Farg‘ona halqa avtomobil yo‘li A-373” hududida 7 gektar maydonda amalga oshiriladi. 

Loyihaning qiymati 5 million dollar bo‘lib, to‘g‘ridan to‘g‘ri xorijiy investitsiyalar hisobiga moliyalashtiriladi. Markaz yiliga 100 ming yo‘lovchiga xizmat ko‘rsatadi va natijada 50 ta yangi ish o‘rni yaratiladi. Loyiha 2025 yilning to‘rtinchi choragida ishga tushishi kutilmoqda.

Ikkinchi loyiha esa zamonaviy logistika markazi va temiryo‘l terminali qurishdan iborat. Bu loyiha Namangan viloyati Chust tumanidagi “Namangan erkin iqtisodiy zonasi”da 10 gektar maydonda joylashadi. 

Loyiha qiymati 50 million dollar bo‘lib, past haroratli omborxonalar va yo‘lovchilar uchun temiryo‘l terminali barpo etiladi. Bu markaz yiliga 100,0 ming tonna mahsulotni saqlash quvvatiga ega va 100 ta ish o‘rni yaratiladi. 

Loyihaning birinchi bosqichi 2025 yilning to‘rtinchi choragida, ikkinchi bosqichi esa 2026 yilning to‘rtinchi choragida ishga tushadi.