Kolumbiya politsiyasi 225 tonna kokain va 6 ta «narkosubmarina»ni musodara qildi

Kolumbiya politsiyasi dunyoning 61 ta davlatidan bo‘lgan hamkasblari bilan birgalikda «Orion» nomi ostida giyohvandlik vositalari savdosiga qarshi keng ko‘lamli operatsiyani o‘tkazdi.

Qayd etilishicha, olti hafta ichida 225 tonna kokain musodara qilingan (2022 yilda ushbu ko‘rsatkich 671 tonnani tashkil etgan). Jami 1,4 ming tonna giyohvandlik vositalari, jumladan, ming tonna marixuana qo‘lga kiritilgan. Ularning umumiy qiymati 8,5 milliard dollarga baholanmoqda. Shuningdek, 400 dan ortiq odam qo‘lga olingan.

Bundan tashqari, politsiya «narkosubmarina»lar — uzunligi 10-25 metrga yetadigan qo‘lbola suvosti qayiqlarini ham aniqlagan. Ular tom ma’noda suvosti kemasi emas, chunki harakat vaqtida suv yuzasida biroz chiqib turadi. Ammo ularni okean yuzasidan payqash mushkul. Bunday kemalardan birinchi navbatda Avstraliyaga giyohvandlik vositalarini tashishda foydalaniladi.

Ma’lumotlarga ko‘ra, Avstraliya bozorida kokain narxining qimmatligi (1 kilogrammi uchun 240 ming dollar — AQShdan 3-6 barobarga qimmat) uni narkosavdogarlar uchun jozibali bozorga aylantirgan. Giyohvandlik vositalarini bu kabi usulda tashish ularga portlardagi qattiq tekshiruvlarni aylanib o‘tish imkonini beradi.

Avvalroq Shimoliy Reyn-Vestfaliya federal yerida – Myonxengladbax, Duysburg va Krefeld shaharlarida, shuningdek, Firzen, Xaynsberg va Noys okruglarida joylashgan oziq-ovqat diskaunterining o‘n bir shoxobchasida banan qutilaridan paketlarda jami 95 kilogramm kokain topilgan edi.

Shuningdek, Ispaniya huquq-tartibot organlari og‘irligi 13 tonnaga teng kokainni to‘xtatib qolgani to‘g‘risida xabar berilgandi — bu mamlakat tarixida musodara qilingan eng katta partiyadir.