Barcha kommunal xizmatlar bir paketga birlashtirilishi mumkin

Yaqin ikki yilda barcha kommunal xizmatlar bir paket sifatida, bitta sub’yekt tomonidan taqdim etiladi va qarzdorlik ham umumlashtiriladi. Bu haqda «Milliy tiklanish» partiyasi raisi Alisher Qodirov ma’lum qildi.

Uning ta’kidlashicha, «chiqindi olib chiqish va elektr to‘lovlari bir tizimga ulanmoqda, navbat gaz va suv to‘lovlariga». Shuningdek, sifatsiz xizmat uchun chorani keskinlashtirish ham ko‘zda tutiladi.

«Chiqindilarni to‘plash, saqlash va qayta ishlash jamiyat salomatligi uchun hayotiy masala. Noto‘g‘ri saqlanayotgan chiqindi poligoni kimyoviy quroldek xavfli va bizda 200 ta shunday poligon bor. Chiqindi masalasi eng oxrigi, xavfli nuqtasiga yetib keldi. Tartib bo‘lmagan tizimga investorlar milliardlab mablag‘ini bermoqchi emas, investitsiyalarsiz esa tizimni o‘zgartirib bo‘lmaydi. Chiqindi va elektr to‘lovlari bir tizimga ulanmoqda, navbat gaz va suv to‘lovlariga. Maqsad vatandoshga sifatli kommunal xizmati ko‘rsatishning samarali tizimini yaratish», deb yozdi Qodirov.

12 dekabr kuni «Milliy tiklanish» partiyasi fraksiyasi chiqindilarni to‘plash va olib chiqishda to‘lov intizomini mustahkamlashga qaratilgan qonun loyihasini muhokama qilgan.

Ma’lumotlarga qaraganda, maishiy chiqindilarni to‘plash va olib chiqish bo‘yicha aholiga ko‘rsatilgan xizmatlar uchun debitor qarzdorlik hozir 596 mlrd so‘mni tashkil etib, yil boshidan 115 mlrd so‘m ko‘paygan. Qarzlarni undirish to‘g‘risidagi arizalarni sudlarga kiritish bo‘yicha Ekologiya, atrof-muhitni muhofaza qilish va iqlim o‘zgarish vazirligining hududiy organlariga yuklatilgan vazifa ham amaliyotda o‘z samarasini bermagan. Yig‘ilishda ushbu masalaga alohida e’tibor qaratilib, fuqarolar alohida ogohlantirishdan keyin ham chiqindi bo‘yicha qarzdorlikni bartaraf etmasa, elektr energiya bo‘yicha to‘lovni amalga oshirmaslik taklif qilinayotgani ta’kidlandi.

«Qonunni birinchi o‘qishda ma’qulladik», deb yozdi Alisher Qodirov.