Rossiya harbiylari yana besh asirni o‘ldirishda ayblandi

Deep State loyihasi va Donetsk oblasti prokuraturasi ma’lumotlariga ko‘ra, rossiyalik harbiylar taslim bo‘lgan Ukraina armiyasining besh nafar askarini – Donetsk oblasti Volnovaxa rayonidagi Neskuchnoye va Vremevka qishloqlarida o‘ldirgan.

Foto: Telegram / Donetsk_obl_prokuratura

Ukrainada rossiyalik harbiylar tomonidan asirlarning navbatdagi qatl etilishi tekshirilmoqda. Bu safar gap jangovar harakatlar olib borilayotgan ikki xil joyda: Neskuchnoye qishlog‘ida va Donetsk oblasti Volnovaxa rayoni Vremevka qishlog‘ida sodir bo‘lgan ikkita holat haqida ketyapti. Bu haqda 6 yanvar, dushanba kuni Donetsk oblasti prokuraturasi Telegramʼda uch kun avval rus qo‘shinlari tomonidan Vremevka hududidagi Ukraina istehkomlari egallab olingani va undan keyingi voqealar haqida ma’lum qildi.

«Shundan so‘ng, dushman bo‘linmasi xalqaro gumanitar huquq normalarini ataylab buzgan holda, ikki himoyachining boshiga o‘q uzdi. Okkupantlar askarlarning o‘lganiga ishonch hosil qilishga qaror qilishdi va ularga yana bir necha marta o‘q uzdilar», deyiladi hisobotda. Hozirda tergovchilar jinoyat holatlarini o‘rganmoqda va ishtirokchilarni aniqlash bilan band.

O‘z navbatida, Ukrainaning Deep State Telegram-kanaliga ko‘ra, bu xuddi shu kuni, 3 yanvarda Neskuchnoye qishlog‘i yaqinida suratga olingan dron tasvirlari bilan tasdiqlangan. «Jangchilar taslim bo‘lishdi, ularning qo‘llarini bog‘lashdi, pozitsiya oldiga olib chiqishdi va boshiga o‘q uzishdi», deyiladi xabarda.

Ukraina ombudsmani: RF askarlari harbiy asirlarni otib tashladi

Rossiya askarlari besh ukrainalik harbiy asirni otib tashladi, dedi 22 dekabr kuni Ukraina Oliy radasining inson huquqlari bo‘yicha vakolatli vakili Dmitriy Lubinets.

Uning so‘zlariga ko‘ra, qatl videosi general-korner Mark Bezruchko nomidagi Ukraina quruqlikdagi qo‘shinlarining 110-alohida mexanizatsiyalashgan brigadasi taktik bo‘linmasi tomonidan tarqatilgan.

Ukraina ombudsmanining so‘zlariga ko‘ra, gap «taslim bo‘lgan askarlarning ehtimoliy qatl etilishi» haqida ketmoqda. «Ukrainalik harbiy asirlarni otib tashlagan rossiyalik harbiy jinoyatchilar xalqaro tribunal oldiga chiqib, qonunda nazarda tutilgan eng og‘ir jazoga tortilishi kerak», — dedi Oliy rada vakili.

Lubinets voqea haqida BMT va Xalqaro Qizil Xoch qo‘mitasiga xabar qilishga va’da berdi.

#Rossiya #asir