2024 yilda eng ko‘p pul ishlab topgan shaxmatchilar ma’lum qilindi

2024 yilda shaxmat turnirlarida eng ko‘p mukofot pullarini qo‘lga kiritgan shaxmatchilar ro‘yxati e’lon qilindi.

Qayd etilishicha, o‘tgan yilda yangi jahon chempioni, hindistonlik 18 yoshli grossmeyster Gukesh Dommaraju hamda xitoylik Ding Liren eng ko‘p daromad qilgan shaxmatchilar bo‘lishgan. Xususan, Dommaraju 1 mln 577 ming dollar, Liren esa 1 mln 183 ming dollar ishlab topgan. 

So‘nggi yillarda umumiy reytingdagi peshqadamlikni hech kimga bermay kelayotgan Magnus Karlsenning shaxmat turnirlaridan yutgan daromadi 633 ming dollarni tashkil qilgan. O‘tgan mavsumda bor-yo‘g‘i 17 nafar shaxmatchi 100 ming dollardan ko‘proq mukofot puli olgan. Ular orasida hamyurtimiz Nodirbek Abdusattorov ham bor. Jumladan, Abdusattorov ortda qolgan yilda o‘tgan musobaqalarda qariyb 133 ming dollarlik pul mukofotlariga ega chiqqan. Buning uchun u 12 ta asosiy turnirda ishtirok etgan.

Statistik ma’lumotlarga ko‘ra, barcha davrlarning eng boy shaxmatchisi norvegiyalik Magnus Karlsen hisoblanadi. Butun faoliyati davomida u 10,7 million dollar yig‘gan. Undan keyingi o‘rinlarda mashhur jahon chempionlari Vishvanatan Anand (Hindiston) - 9,5 mln dollar, Garri Kasparov - 7,96 mln dollar va Anatoliy Karpov – 5,9 mln dollar.