Shimoliy Yevropa va Boltiqbo‘yi - Rossiya neftiga narxni pasaytirish tarafdori

Shimoliy Yevropa va Boltiqbo‘yi davlatlari Moskvaning Ukrainadagi urushini moliyalashtirish uchun foydalanadigan daromadlarini kamaytirish maqsadida G7 davlatlari muvofiqlashtirishi doirasida Rossiya nefti narxini pasaytirishga chaqirmoqda. Bu haqda 12 yanvar, yakshanba kuni Shvetsiya internet nashrlari Yevropa komissiyasiga tashqi ishlar vazirlari tomonidan tegishli taklif bilan xat yuborilgani haqida yozdi.

Xususan, Shvetsiya Tashqi ishlar vazirligi rahbari Mariya Malmer Stenergaard murojaatga imzo chekdi. «Rossiya neftining narxi qanchalik past bo‘lsa, tinchlik shunchalik tez keladi», dedi u Selen shahrida bo‘lib o‘tgan mudofaa konferensiyasida.

Vazirning hisob-kitoblariga ko‘ra, bir barrel narxining 10 dollarga pasayishi Rossiya uchun yiliga 200 milliard dollar yo‘qotishni anglatadi, bu Rossiya harbiy budjetining 15 foiziga to‘g‘ri keladi. 2022 yil oktyabr oyida YeI va "Katta yettilik" davlatlari Rossiya neftining bir barreli 60 AQSh dollaridan ortiq narxda sotilmasligiga kelishib oldilar.

Berbok: Rossiya «soyadagi floti»ning zanglagan tankerlari - YeI uchun tahdid

Boltiq dengizida boshqaruvni yo‘qotgan va deyarli 100 ming tonna neft bilan Germaniya qirg‘oqlari yaqinida suzib yurgan Eventin tankeri Rossiya «soyadagi floti»ning bir qismi bo‘lib, eski kemalardan foydalanish Yevropa xavfsizligiga tahdid soladi. Bu haqda 10 yanvar kuni Germaniya tashqi ishlar vaziri Annalena Berbok ma’lum qildi. Shu bilan birga, Berbok Rossiya prezidenti Vladimir Putinni nafaqat «zanglagan tankerlar parkidan foydalanish» orqali Moskvaga joriy qilingan sanksiyalarni chetlab o‘tishda, balki «Boltiqbo‘yi mintaqasida turizm tahdid ostida qolishini ataylab ta’minlashda» aybladi.

Avvalroq Germaniyaning Markaziy dengiz favqulodda qo‘mondonligi Rossiyaning Ust-Luga portidan chiqqan, 99 ming tonna neft olib ketayotgan Eventin tankeri Germaniyaning Ryugen oroli yaqinida boshqaruvni yo‘qotgani haqida xabar bergan edi. Kemaga uchta nemis buksiri yuborildi. Germaniya tomonining ma’lum qilishicha, kemada neft sizib chiqishi aniqlanmagan, atrof-muhitga hech qanday tahdid yo‘q, ekipajni evakuatsiya qilishning hojati yo‘q.

Eventin Panama bayrog‘i ostida harakatlanadi, lekin aslida, Greenpeace xalqaro ekologik tashkilotiga ko‘ra, u Rossiya Federatsiyasining «soyadagi floti» deb ataladigan kemalardan biridir. U so‘nggi yillarda turli kichik mamlakatlarda ro‘yxatga olingan, ammo amalda Rossiya nazorati ostida bo‘lgan bir necha yuz tankerlardan iborat. Moskva Rossiyaning Ukrainaga bostirib kirishi munosabati bilan G‘arb davlatlari tomonidan kiritilgan embargoni chetlab o‘tish uchun ulardan neft sotish maqsadida foydalanadi.