Moderna aksiyalari narxi 21 foizga tushib ketdi

Amerikaning Moderna Inc. biotexnologik kompaniyasi 2025 yilda 2,5 milliard dollargacha — o‘tgan yilga nisbatan va bozor kutilmalaridan kamroq foyda ko‘rishni rejalashtirmoqda. Ushbu prognoz e’lon qilinganidan keyin Moderna aksiyalari qiymati 13 yanvar kungi savdolarda 21 foizga tushib ketdi. 

Kompaniya press-relizida ta’kidlanishicha, daromadning asosiy qismi yilning ikkinchi yarmida Spikevax va mRESVIA vaksinalari hisobiga keladi. 

Facset tahlilchilar o‘rtasida o‘tkazgan so‘rov natijalarida keltirilishicha, kompaniyaning bu yilgi sotuvi taxminan 2,92 milliard dollarni tashkil qiladi.

2024 yilda Moderna’ning savdo hajmi, dastlabki ma’lumotlarga ko‘ra, 3-3,1 milliard dollarni tashkil etgan bo‘lib, ularning 1,7 milliard dollari AQSh, qolgani esa chet el bozorlari hisobiga to‘g‘ri kelgan.

Kompaniya o‘tgan yili operatsion xarajatlarni 2023 yilga nisbatan 25 foizga qisqartirgan va 2025 yilda 1 milliard dollar, 2026 yilda yana 500 million dollar tejashga erishish niyatida.

2024 yil oxirida Moderna balansidagi pul mablag‘lari va ularning ekvivalentlari hajmi 9,5 milliard dollarni tashkil etgan. Kompaniya joriy yil oxiriga borib ushbu ko‘rsatkich 6 milliard dollar bo‘lishini kutmoqda.

So‘nggi 12 oy ichida Moderna kapitalizatsiyasi 68 foizga tushib ketgan.