Бизнес ва бошқарув республика олий мактаби директори ўзгарди

Тошкент шаҳридаги Халқаро Вестминстер университети декан муовини Рустам Абдураупов Ўзбекистон Республикаси президенти ҳузуридаги Лойиҳа бошқаруви миллий агентлигининг  Абу Райҳон Беруний номидаги Республика бизнес ва бошқарув олий мактабига раҳбар бўлди.

Рустам Абдураупов 1985 йил июль ойида туғилган. 2005 йилда Тошкент ирригация ва қишлоқ хўжалигини механизациялаш муҳандислари институтини ва 2007 йилда Тошкент молия институтини тамомлаганидан сўнг ўзининг илмий – тадқиқот фаолиятини Денвер университети (АҚШ) ва Вагенинген университетида (Нидерландия) давом эттирган.

Янги директор раҳбарлигида олий мактаб жамоаси РББОМга юклатилган вазифаларни бажаришни ният қилган. Халқаро тажрибани фаол жорий этиш, етакчи фан-таълим муассасалари билан ҳамкорликни мустаҳкамлаш режалаштирилмоқда. Шу билан бирга, double degree (қўшалоқ диплом) магистратура дастурларини аккредитация қилиш бўйича режалар қисқа муддатда амалга оширилади.

Эслатиб ўтамиз, президентнинг жорий йил 6 сентябрдаги қарорига мувофиқ, Ўзбекистон Республикаси президенти ҳузуридаги Лойиҳа бошқаруви миллий агентлиги ҳузуридаги Корпоратив бошқарув илмий-таълим марказининг номи Ўзбекистон Республикаси президенти ҳузуридаги Лойиҳа бошқаруви миллий агентлиги қошидаги Абу Райҳон Беруний номидаги Бизнес ва бошқарув республика олий мактаби деб ўзгартирилди.