Ўзбекистонда Chevrolet Monza ишлаб чиқариш йўлга қўйилиши мумкин

UzAuto Motors компанияси Chevrolet Monza ишлаб чиқаришни йўлга қўйиши мумкин.

Компания расмий вакилининг Kun.uz'га маълум қилишича, бу моделдаги автомобилларни ишлаб чиқаришни йўлга қўйиш катта инвестициялар жалб этишни талаб қилади. Шу билан бирга, ишлаб чиқариш нафақат Асакадаги автомобил заводини қайта жиҳозлаш, балки маҳаллий етказиб берувчилар томонидан зарур бутловчи қисмлар ишлаб чиқаришни ташкил этишни ҳам тақозо этади. Бироқ Chevrolet Monza автомобилларига талаб ва қизиқишнинг ортиб бораётгани ҳисобига UzAuto Motors SKD усулида ишлаб чиқариш имкониятини кўриб чиқмоқда.

Ўзбекистонда Chevrolet Monza ишлаб чиқарилиши ҳақида 2019 йилда ҳам хабарлар тарқалган, ўшанда бу модел Chevrolet Cobalt ўрнини эгаллаши тахмин қилинганди. Лекин ўшанда “Ўзавтосаноат” вакиллари бундай режа борлигини рад этганди.

Маълумот учун, Monza – Chevrolet компаниясининг энг арзон автомобилларидан бири. Бу моделнинг янгиланган 3 та версияси 2022 йилнинг сентябр ойида Хитойда 13 200 доллардан 15 200 долларгача бўлган нархларда сотувга чиқарилган. 

Эслатиб ўтамиз, 2022 йилнинг декабр ойи бошида бюджет моделлар – Damas, Labo, Cobalt вa Gentra учун шартнома тузиш тўхтатилганди. Бу моделларга шартнома бериш қачон бошланиши ҳалигача ноаниқ бўлиб қолмоқда.