Қўшимча функционаллар
-
Тунги кўриниш
Республикачи Майк Жонсон АҚШ Конгресси Вакиллар палатаси спикери бўлди
Бир неча урнишлардан сўнг, Вакиллар палатасига спикер сайланди.
Фото: AFP
Республикачи конгрессмен Майк Жонсон АҚШ Конгресси Вакиллар палатасининг 56-спикери бўлди. У сайловда 220 та овоз тўплади. Бу лавозимни эгаллаш учун камида 217 овоз талаб қилинарди.
Жонсон 51 ёшда ва 2016 йилдан буён АҚШ Конгресси қуйи палатаси депутати. Сиёсатчи Луизиана университетини тамомлаган, у ерда ҳуқуқ факултетида таълим олган. Кейин у тахминан 20 йил давомида конституциявий ҳуқуқ билан шуғулланган. Жонсон оилали, тўрт нафар фарзанди бор.
3 октябр куни АҚШ Конгресси Вакиллар палатаси республикачи Кевин МакКартини спикерлик лавозимидан четлаштириш учун овоз берди. Унинг партиядоши Патрик Макҳенри муваққат спикер этиб тайинланди.
Шундан сўнг, конгрессменлар Стив Скализ ва Жим Жордан спикер лавозимини эгаллашга ҳаракат қилишди, аммо иккаласи ҳам етарли овоз тўплай олмади. Яна бир номзод Том Эммер шу ҳафта бошида спикерликка сайланиш истагидан воз кечди. Вакиллар палатасида озчиликка эга демократлар ҳар сафар ўз номзоди Ҳаким Жеффрисга овоз беришди.
Аввалроқ, Вакиллар палатасида спикер бўлмаса, у бюджет бўйича музокара ўтказа олмаслиги ёки қонун лойиҳаларини, жумладан, Оқ уйнинг Украина ва Исроилга ҳарбий ёрдам учун маблағ ажратиш сўровларини тасдиқлай олмаслиги таъкидланган эди.
