Кулеба: Украинага халқаро ёрдам кўлами камаяётгани йўқ

Украина Россия агрессиясига қарши курашда халқаро ёрдам заифлашганини сезмаяпти, деди Украина ташқи ишлар вазири Дмитрий Кулеба 2 ноябр, пайшанба куни. Германиянинг ZDF ижтимоий-ҳуқуқий каналидаги кўрсатувда телебошловчи Майбрит Илнер билан суҳбатда у Яқин Шарқдаги урушга қарамай, «ҳамкорларнинг қўллаб-қувватлаши ҳеч қандай тарзда камайиб бораётганини» кўрмаётганини айтди.

Аксинча, Киев, Кулебанинг сўзларига кўра, «барча даражаларда Украинани қўллаб-қувватлаш давом этишига кафолат олган». Ҳамкорларда бунинг учун имкониятлар ҳам мавжуд, деди вазир. Украина Яқин Шарқдаги вазият янада кескинлашмаслигига умид қилмоқда, гарчи «вазият ўзгариши мумкинлигини» тан олади, деди у. 

«Бу уруш қанча узоқ давом этса, шунчалик кўп ресурслар керак бўлади», дея қўшимча қилди Кулеба Яқин Шарқ ҳақида гапирар экан. Бироқ, унинг фикрига кўра, «асосий пойтахтларда нима хавф остида экани - Украина бўйича ҳам, Яқин Шарқ бўйича ҳам жуда аниқ тушунча мавжуд». Гап фақат дунёнинг ушбу минтақаларида хавфсизлик ҳақида кетаётгани йўқ, дея таъкидлади Украина ТИВ раҳбари. 

Кулеба - Taurus ракеталарини етказиб бериш ҳақида 

Украинага Taurus қанотли ракеталарини етказиб бериш бўйича муҳокама бўйича, Кулеба Германиянинг бу борадаги қарорни қабул қилиши учун вақт керак бўлишига оид позициясини тушунишини билдирди. Унинг сўзларига кўра, Киев буни ҳурмат қилади. 

Шу билан бирга, вазир ушбу қанотли ракеталарнинг масофаси ҳақидаги баҳсни маъносиз деб атади. Украина Россия ҳудудига етиб бориш учун бошқа қурол тизимларини чегарага кўчириши мумкин. «Демак, гап бу ҳақда эмас. Бутун мунозара ишонч масаласига алоқадор», - деди Кулеба Украина ҳукумати Россия ҳудудида Taurus ракеталарини ишлатмасликка ваъда берганини таъкидлаб. «Биз берган ваъдамизда турамиз», деди у.