АҚШ ва Киев Украинага кейинги ҳарбий ёрдамни муҳокама қилди

АҚШ мудофаа вазири Ллойд Остин украиналик ҳамкасби Рустем Умеров билан «Украинанинг шошилинч ҳарбий эҳтиёжларини қондириш учун» Киев иттифоқчилари ва ҳамкорлари томонидан қўллаб-қувватланишини давом эттиришни муҳокама қилди. Бу ҳақда 19 август, душанба куни Пентагон матбуот котиби ўринбосари Сабрина Сингх маълум қилди.

«Вазир Қўшма Штатлар Украинани қўллаб-қувватлашини ва иккала мамлакат яқин алоқаларни давом эттиришини тасдиқлади», - деди у. Сингх Украинада рус қўшинлари ҳаракатланиши кузатилаётганини тасдиқлади, бироқ улар аниқ қайси ҳудудлардан Курск вилоятига ўтказилаётганига аниқлик киритмади.

Пентагон матбуот хизмати раҳбари ўринбосари Украина Қуролли кучларининг Россия Федерациясидаги ҳужуми фонида Вашингтон Киевни қўшимча сунъий йўлдош маълумотлари билан таъминлаётгани ёки йўқлигига аниқлик киритмади.

Зеленский: Украинанинг мақсади - «буфер зонасини яратиш»

Украина Қуролли кучларининг Курск вилоятидаги кенг кўламли ҳужум операцияси 6 августдан бери давом этмоқда. Бу Россиянинг Украинага қарши кенг кўламли уруши 2022 йил февралида бошланганидан бери бундай турдаги биринчи ҳужумдир. 9 август куни Россия ҳукумати Белгород, Брянск ва Курск вилоятларида «аксилтеррор операцияси режими»ни жорий қилди. 

Украина президенти Володимир Зеленский Украина Қуролли кучларининг Курск вилоятидаги ҳужум операцияси асосий мақсадини Россия кейинги ҳужумлари олдини олиш учун «буфер зона яратиш» деб атади. «Мудофаа ҳаракатларимизнинг асосий вазифаси - имкон қадар кўпроқ Россия салоҳиятини, уруш салоҳиятини йўқ қилиш ва максимал қарши ҳужумни амалга ошириш. Хусусан, агрессор ҳудудида буфер зонани яратиш - Курскдаги операциямиз мақсади», деди у 18 август куни кечки мурожаатида. 

Киев Ғарбдан ҳарбий техника етказиб беришни тезлаштиришни сўрамоқда

Зеленский Ғарб етакчиларига алоҳида мурожаат қилиб, уларни Украинага янги ҳарбий ёрдам етказишни тезлаштиришга чақирди. «Уруш учун таътил йўқ, эълон қилинган пакетларни ўз вақтида таъминлаш керак», деди Украина президенти. 

Украина ҳарбийлари Россия Федерацияси Курск вилоятидаги 1250 квадрат километрдан ортиқ ҳудуд ва 92 аҳоли пунктини назорат қилмоқда, деди Зеленский 19 август куни Украинанинг хорижий дипломатик муассасалари раҳбарлари билан учрашувда.