Rossiyaning qator mintaqalarida maktab o‘quvchilari 10-sinfga qabul qilinmayapti

Rossiyaning bir qator mintaqalarida ota-onalar o‘z farzandlarini 10-sinfga kirita olmaslik muammosiga duch kelmoqda, deb yozadi «Kommersant» gazetasi 26 avgust, dushanba kuni. Uning ma’lumotlariga ko‘ra, bu Rossiyada maktablarga o‘ninchi sinfga o‘z mezonlari bo‘yicha bolalarni tanlash imkonini beradigan yangi davlat ta’lim standarti joriy etilgani bilan bog‘liq. Natijada o‘quvchilarning bir qismi ixtisoslashtirilgan sinflarga, jumladan, o‘zlari o‘qigan maktablarga ham o‘qishga kira olmadi, umumta’lim sinflarida esa o‘rin qolmadi.

«Moskva ota-onalari» jamoat harakati raisi Ilona Menkovaning aytishicha, birgina ularga 50 ga yaqin odam yordam so‘rab murojaat qilgan. Ularning aytishicha, maktab mutasaddilari tanlovdan o‘tmagan farzandlarini kollejga yuborishni qat’iy tavsiya qilgan. Menkova ba’zi ota-onalar 10-sinf uchun kurashmaganini va ularning farzandlari kollejga kirganini taxmin qildi.

«Kommersant» nashrining yozishicha, Chelyabinsk va Irkutsk viloyatlari hamda Krasnodar o‘lkasidagi ota-onalar ham farzandini 10-sinfga kiritishning imkoni yo‘qligiga duch kelgan. Bir qator hollarda ro‘yxatga olish prokuraturaga murojaat qilgandan keyingina amalga oshirilgan.

Yordam uchun prokurorga murojaat 

Shu tariqa, Rossiya Federatsiyasi Bosh prokuraturasi Krasnodar o‘lkasidan ota-onalar murojaatini ko‘rib chiqib, Rossiya Konstitutsiyaviy sudining 2020 yilgi qarorini eslatib o‘tdi, unda ixtisoslashtirilgan sinflarga individual tanlash tartibi to‘g‘risidagi qoida bolalarni chiqarib yuborish uchun asos bo‘la olmasligi belgilangan.

Natijada «o‘quvchilarning huquqlari tiklandi», bolalarni qabul qilishdan bosh tortgan maktab direktori esa «ta’lim faoliyatini olib borish va o‘quv jarayonini tashkil etish talablarini buzish» moddasi bo‘yicha ma’muriy javobgarlikka tortildi. Bosh prokuratura Rossiya Federatsiyasi ta’lim vaziri Sergey Kravsovni mavjud vaziyat haqida xabardor qildi. Ta’lim vazirligi «Kommersant» so‘roviga javob bermadi.

Rossiyadagi maktablarda migrantlar farzandlari sonini cheklash taklif etildi

Avvalroq deputatlarning parlamentdagi «Spravedlivaya Rossiya» fraksiyasi migrantlar bolalari uchun maktablarga kvota berish to‘g‘risidagi qonun loyihasini tayyorlayotgani ma’lum qilingandi. Bu haqda RIA «Novosti» Davlat dumasi nazorat qo‘mitasi raisi birinchi o‘rinbosari Dmitriy Gusevga tayanib yozdi.

«Muhim tashabbus - bu maktablarda bolalar uchun kvotalar belgilash, bu haqda asosan Moskvadagilar gapirmoqda, chunki bu Moskvadagi muhim voqea. Taklif esa to‘g‘ri, bir sinfda uch nafardan ortiq migrant bola bo‘lmasligi kerak. Bu Moskva hukumati uchun juda jiddiy vazifa. Kuzgi sessiya boshlanadi, biz bu tashabbusni tayyorlab, ilgari suramiz», dedi Gusev.

Uning ta’kidlashicha, anklavlarga yo‘l va migrantlarning «klasterlashuvi» xorijliklar integratsiyasiga yordam bermaydi.