RF Tergov qo‘mitasi Mudofaa vazirligi mansabdorlariga qarshi yangi ish ochdi

RF Tergov qo‘mitasi Rossiya Mudofaa vazirligining navbatdagi mansabdor shaxslarini korrupsiyada gumon qilib, tergov olib bormoqda. Mudofaa vazirligining 4924-harbiy vakolatxonasi boshlig‘i Ivan Populovskiy va uning qo‘l ostidagi Grigoriy Zoringa nisbatan jinoiy ish qo‘zg‘atildi, deb xabar berdi 16 sentabr, dushanba kuni idora. Mansabdor shaxslar o‘ta yirik miqdorda pora olganlikda ayblanmoqda, deyiladi press-relizda.

11 mln rubldan ortiq miqdordagi pora

Tergov ma’lumotlariga ko‘ra, Mudofaa vazirligi ehtiyojlari uchun elektrotexnika mahsulotlari va kabellar yetkazib berish bo‘yicha davlat buyurtmalarini bajaruvchi ikki tashkilot mahsulot nazoratini susaytirish va pora evaziga boshqa imtiyozlar olish maqsadida idora xodimlari bilan til biriktirgan.

Gap Butunrossiya Kabel mahsulotlari ilmiy-tadqiqot loyiha instituti va Kabel sanoati ilmiy-konstruktorlik-texnologik instituti tomonidan mudofaa buyurtmalarini bajarish haqida bormoqda. Shartnomalarning umumiy miqdori 1,2 milliard rublni tashkil etdi.

Bundan tashqari, 2021 yildan 2024 yilgacha bo‘lgan davrda Populovskiy va Zorin yetkazib beruvchilardan 11 million rubldan ortiq pora olgan. Ular o‘z ayblarini tan oldilar, deya ta’kidlamoqda Tergov qo‘mitasi. «Ularning shu kabi boshqa jinoyatlarga, jumladan, davlat mudofaa buyurtmasi ehtiyojlari uchun ajratilgan mablag‘larni o‘g‘irlash bilan bog‘liq jinoyatlarga aloqadorligi tekshirilmoqda», — deyiladi xabarda.

Mudofaa vazirligi mansabdorlariga nisbatan ishlar

Rossiya Federatsiyasining Ukrainaga qarshi davom etayotgan urushi fonida, so‘nggi oylarda Rossiyada Mudofaa vazirligi mansabdor shaxslari va Rossiya qurolli kuchlari bosh shtabi vakillariga nisbatan bir qator ishlar qo‘zg‘atildi. Xususan, avgust oyi boshida «Voyentorg» AJ bosh direktori Vladimir Pavlov Mudofaa vazirligi mablag‘larini o‘zlashtirganlikda ayblanib, hibsga olingan edi. Xuddi shu jinoiy ish bo‘yicha tadbirkor Timur Isakov ham ayblanmoqda. Tergov ma’lumotlariga ko‘ra, Pavlov va Isakov Rossiya Federatsiyasining bir qator hududlaridagi sheriklari bilan birgalikda davlat shartnomasi bo‘yicha 400 million rubldan ortiq miqdorda oshirilgan narxda armiya nesesserlari sotib olinishini ta’minlagan.

Iyul oyi oxirida Rossiya Mudofaa vazirligining Harbiy-qurilish kompaniyasi bosh direktori Andrey Belkov Moskvada qo‘lga olingani ma’lum bo‘ldi. U 2019 yilda Mudofaa vazirligining davolash-diagnostika markazi uchun davlat tomonidan oshirilgan narxda - 76 million rubl o‘rniga 121 million rublga tomograf sotib olishni tashkil qilganlikda gumonlanmoqda.

Aprel oyida mudofaa vazirining sobiq o‘rinbosari Timur Ivanov katta miqdorda pora olganlikda ayblanib, hibsga olingan edi. May oyida Rossiya Mudofaa vazirligining kadrlar bo‘limi boshlig‘i Yuriy Kuznetsov ham pora olishda ayblanib qo‘lga olingan. Xuddi shu oyda Rossiya Mudofaa vazirligini tanqid qilgan 58-armiyaning sobiq qo‘mondoni Ivan Popov firibgarlikda ayblanib hibsga olingan. May oyi oxirida Rossiya qurolli kuchlari bosh shtabi boshlig‘ining sobiq o‘rinbosari Vadim Shamarin ushlandi. U 36 million rubl miqdorida pora olganlikda ayblanmoqda va aybini qisman tan olgan.