Машҳур спортчиларнинг энг ғайриоддий харидлари

Дэвид Бекхэм ким ошди савдоларининг бирида анчайин ғайриоддий харидни амалга оширди. Англия терма жамоасининг собиқ футболчиси ўз имзоси туширилган Лондон “Арсенал”ининг футболкасини сотиб олди. Келинг, машҳур спортчилар қандай ғайриоддий харидларни амалга оширганини кўриб чиқамиз.

Дэвид Бекхэм, ўз имзоси туширилган футболка

Кўпчилик футбол ихлосмандлари “Манчестер Юнайтед”нинг афсонавий ярим ҳимоячисига ўз имзоси қўйилган, бундан ташқари “қизил иблис”ларнинг рақиби бўлган жамоа белгиси туширилган футболка нега керак бўлганини аллақачон англаб етишди. 10 минг фунт стерлинг миқдоридаги бу футболкани Бекс “канонирлар” академиясида шуғулланаётган кичик ўғли учун сотиб олган экан. “Арсенал”нинг катта ишқибози Ромео 1 сентябрь куни 13 ёшга тўлди.

Футболка хариди Лондонда бўлиб ўтган хайрия ким ошди савдоси доирасида амалга оширилди. Бекхэм томонидан сарфланган пул мусиқа ёрдамида даволанадиган турли хил касалликлар билан шуғулланувчи фондга юборилди. 

Криштиану Роналду ва  мум фигура

Мадрид “Реал”и ва Португалия терма жамоасининг ҳужумчиси Криштиану Роналдунинг қилган сўнгги харидларидан бири сабабли унга баъзилар ўзини яхши кўрадиган, нарцизм билан оғриган шахс сифатида қарашмоқда. Форвард британиялик ҳайкалтарош Майкл Уэйд томонидан ишланган ўзининг мум фигураси учун 20 минг фунт стерлингни аямади. Футболчи устадан бундан икки йил олдин Мадрид музейларидан бирига ўрнатилган экспонатнинг аниқ нусхасини ясаб беришини сўради. 

Ўйинчи ишга жуда синчковлик билан ёндашди: Роналду ҳайкалтарошга фигура учун ўзининг футболка ва бутсисини юборди, унинг соч турмаги бўйича эса, футболчининг шахсий сартароши шуғулланди. “Қироллик клуби” форварди ўз ҳайкалини Испаниядаги уйларидан бирига ўрнатмоқчи.

Майк Тайсон ва тилла ванна

“Темир Тайсон”нинг ҳаётида оқ ва қора чизиқлар бўлди, аммо америкалик боксчи ҳаётида профессионал фаолиятининг бошланишида деярли пул билан боғлиқ муаммолар бўлгани йўқ. Тайсон фильмларда эпизод ролларини ўйнаб ҳам даромад кўради. Спортчи 2004 йилда собиқ аёли, актриса Робин Гивенснинг туғилган кунига ҳашаматли совға қилди. У нархи икки миллион долларлик тилла ванна эди.

Спортчи 1989 йилда ажрашган Гивенснинг бундай совғага қандай қараганини аниқ билмаймиз-у, аммо у ажрашганидан сўнг Тайсон билан алоқаларини қайта тикламагани аниқ.

Златан Ибрагимович, орол

Жаҳон футболи юлдузи Златан Ибрагимович – ов ишқибози. Яқинда форвард Стокгольмдан узоқ бўлмаган жойда бутун бошли оролни сотиб олди. Маларен кўлида жойлашган Давенсо ороли Швецияга катталиги жиҳатидан учинчи ўринда туради, унинг майдони 500 гектар. Оролда ёввойи буғу ва тўнғизлар яшайди, хоҳишга қараб у ерда балиқ ови билан ҳам шуғулланиш мумкин.

Хариднинг расмий баҳоси тўғрисида хабар қилинмади. Баъзи манбаларга кўра, оролнинг нархи 2,5-3 миллион евро.

Пер-Эмерик Обамеянг, Swarovski дан бутси

"Боруссия” ҳужумчиси Пер-Эмерик Обамеянг футболчилар жамоасидан ўзининг пушти, оч яшил ва бинафша ранг бутсилари билан ажралиб туришга қарор қилди. Габон терма жамоаси форварди спорт оёқ кийимини Swarovski кристаллари билан безади. Ўйинчи ўзи учун икки жуфт бутси буюртма қилди: бири – Габон жамоаси рангида, иккинчиси – собиқ жамоаси, Франциянинг “Сент-Этен” жамоаси белгиси рангида. Ҳар бир жуфтнинг нархи 3700 еврони ташкил қилади.

Ўйинчи бу ялтироқ бутсиларда майдонга бор-йўғи бир марта – Франция чемпионатидаги “Лион” жамоасига қарши ўйин олди тайёргарлиги вақтида кийиб чиқди. Обамеянг расмий учрашувларга анъанавий пойафзалда чиқишни афзал билди. Кейинроқ бошқа африкалик футболчилар ҳам габонлик футболчининг йўлини тутишди. Саломон Калу, Диде Дрогба ва Флоран Малуда коллекция учун шунга ўхшаш дабдабали бутсиларни ясаттиришди, бироқ уларда майдонга тушишга ҳали қарор қилишганича йўқ. 

Флойд Мэйуэзер ва олмос суперкар

Америкалик боксчи Флойд Мэйуэзер яқинда дунёдаги энг кўп ҳақ тўланадиган спортчи сифатида тан олинди. Жорий йилда унинг маблағи филиппинлик Мэнни Пакяо билан уюштирилган жанг гонорари эвазига 280 миллион долларга тўлдирилди. Шундай статусни намойиш қилиш учун боксчи жиддий харидни амалга оширди.  Мэйуэзер 4,8 миллион долларга ноёб суперкар Koenigsegg CCXR Trevitaни сотиб олди.

Автомобил кузовига сепилган олмос чанглари ҳамда чекланган миқдорда (бор-йўғи учта) эканлиги унинг ўзига хос жиҳатлари ҳисобланади. Боксчининг Koenigsegg кичик ҳажми (1,3 тоннадан камроқ) билан ажралиб туради. Унинг двигатели эса этанол ва бензин аралашмасида ишлай олади. Суперкар соатига 402 километр тезликда юра олади.

Манба: XABARDOR.UZ