Топ-10. Қишнинг энг асосий трансферлари

31 январь куни қишки трансферлар даричаси ёпилди. 1 январь куни бошланган трансферлар ойида жамоалар аввалги йиллардагига қараганда фаоллик кўрсатишди. Хусусан, инглиз клублари трансферлар учун жами 430 миллион фунтдан ортиқ маблағ сарфлаб, рекордни янгилашди.

Қуйида январь ойида амалга оширилган 10та асосий трансфер келтирилади.

10. Уолкотт «Эвертон»да

«Эвертон» январда 3 футболчи олди - дастлаб «Бешиктош»дан Женк Тўсун 27 млн фунт эвазига трансфер қилинди, у ўтган йил ёзида «МЮ»га кетган Ромелу Лукаку ўрнини тўлдириши кўзда тутилган. Кейинроқ янада жиддий трансфер амалга оширилди - «Арсенал»дан Тео Уолкотт 20 млн фунт эвазига олиб келинди. 2006 йилдан буён Лондон клубида тўп суриб келган Теони «янги Анри» деб аташганди. У 2010-2013 йилларда жамоанинг асосий футболчисига айланди, аммо кейинги йилларда жароҳатлар унинг ўйини пасайишига сабабчи бўлди, у 14 рақамида ўйнасада, Анрининг ўрнини боса олмади ва «ими-жимида» жамоани тарк этди (у тунда, жамоа базасида ҳеч ким йўқлигида, буюмларини чиқиндилар учун мўлжалланган идишга солиб Ливерпулга кетишига тўғри келди, у жамоадошлари билан хайрлашишга ҳам улгурмади).

«Арсенал»да қайта қуриш даври бошланди.  Жамоани Уолкоттдан ташқари Алексис Санчес, Жиру, Дебюши, Коклен ҳам тарк этди. Уларнинг ўрнига Мхитарян ва Обамеянг (Санчесдан бўшаган 7 рақамини Мхитарян, Уолкоттдан бўшаган 14 рақамини Обамеянг олди) келди, Ўзил ва Уилшер билан шартномалар узайтирилди.

Уолкотт жамоага келиши билан асосий етакчига айланиб олди. Ўтган турда илк бор кўк либосни кийган футболчи «Вест Бромвич» дарвозасига урилган ягона голга ассисентлик қилганди. «Лестер»га қарши 25-тур ўйинида эса, унинг икки голи «Эвертон»га ғалаба олиб келди.

Ливерпулликлар жамоаси охирги соатларда «Манчестер Сити»дан Элиаким Мангаляни мавсум охирига қадар ижарага олди.

9. «Барселона»да яна бир лотин америкалик

Самуэл Умтитининг кутилмаганда сафдан чиқиши ва Хавьер Маскеранонинг январда жамоани тарк этиши мумкинлиги, ҳозирда майдонга тушаётган Томас Вермаленнинг исталган пайтда жароҳатланиб қолиш одати «Барселона»ни январь ойидаёқ марказий ҳимоячи сотиб олишга ундади.

Асосий номзодлар сифатида Ла Лигада ёки Европада етарли тажрибага эга бўлган Иньиго Мартинес, Кулибали ва Де Лигт тилга олинган бўлишига қарамасдан, клуб «Палмейрас»нинг 22 ёшли колумбиялик ҳимоячиси Йерри Минани сотиб олди. Каталонияликлар футболчи учун 12 миллион евро атрофида пул тўлашди ва футболчи 2023 йилгача клуб билан шартномага имзо чекди. Минанинг товон пули 100 миллион евро деб қайд этилди. Кўп мухлислар ушбу трансфер ҳақидаги расмий хабардан кейингина Мина номини илк бор эшитишган бўлса-да, «Барселона» мухлислари учун бу ном янгилик эмас. Бразилия А Сериясида эса, Мина ҳақиқий юлдуз ва сўнгги мавсумнинг энг яхши ҳимоячиси бўлганди.

8. Оливье Жиру Лондонда қолди, лекин бошқа жамоада

Ушбу 31 ёшли франциялик ҳужумчи Обамеянгнинг трансфери бир қисмига айланиб, «Арсенал»дан 17 млн евро эвазига «Челси»га йўл олди.

2012 йилдан буён (у ўша йили «Монпелье»дан Лондонга келганди) «Арсенал»да ҳеч ким Жирудан кўпроқ гол урмаган (253 учрашувда 105 гол). Охирги йилларда Оливье асосий таркибга кира олмай қолди, лекин у захирадан тушиб ҳам жамоанинг асосий тўпурари Санчес билан тенгма-тенг гол урди. Аммо Обамейянг «Арсенал»га келиши унинг кетишини талаб қилди, габонлик футболчидан бўшаётган ўринни «Челси» ҳужумчиси Миши Баштуайи тўлдириши керак эди, у «Челси»да қолдирган жойни эса Жиру бориб эгаллайдиган бўлди. Бу трансфер уч томонни ҳам қониқтиради, «Арсенал» захирада қолаётган футболчиси учун яхшигина маблағга эга бўлди, Жиру Контенинг ўйин услубига мос келиши туфайли кўпроқ ўйнаши мумкин, «Челси» эса Жеко, Кэррол, Крауч ва Льоренте томонидан рад этилгач, улардан қолишмайдиган ҳужумчини қўлга киритди.

7. Лукас Моура Англияда ўз омадини синаб  кўради

Францияда имкониятлари тўла очилмаган бразилиялик футболчи «ПСЖ»дан «Тоттенҳэм»га 25 млн евро эвазига трансфер қилинди.

У Неймар билан бирга Бразилия терма жамоасининг янги авлодида дебют қилганди. Неймар ҳозирда жаҳон миқёсидаги юлдузга айланди, Моура ўз имкониятларини юзага чиқара олмади. Фавқулодда тезкор ва техник имкониятлари юқори бўлган ушбу вингерга Ди Мария, Дракслер ва бошқа футболчилар билан рақобатда ютиб чиқиш учун характер етишмади. Лукас талант борасида уларнинг ҳеч биридан ортда қолмайди. «Тоттенҳэм»да у Маурисио Почеттино бошида барчасини бошидан бошлаши мумкин. Моура учун бу трансфер – ўзини намоён қилиш ва терма жамоа бош мураббийи Титени ўз салоҳиятига ишонтириб, жаҳон чемпионатига бориш учун охирги имконият бўлиши мумкин.

6. Эмерик Лапорт. «Манчестер Сити»да яна бир қимматбаҳо ҳимоячи

Агар «Ливерпуль» бўлмаганида «Манчестер Сити» яна ҳимоячилар бўйича рекордни янгилаган бўларди. «Атлетик» ҳимоячиси Эмерик Лапорт 65 млн евро эвазига Англияга келди. Унинг трансфери ҳақида бир неча йилдан буён гапиришаётганди, аммо у басклар юртини тарк этишга шошилмади. Гвардиола унинг трансферида шахсий ташаббус кўрсатди. Ушбу жисмонан бақувват, тезкор ва ҳужумларга яхши қўшиладиган ушбу футболчи ҳозирги «Манчестер Сити» учун мос вариант, асосийси у – биринчи пасда ажойиб ҳаракат қилади.

Топ-10. Ёзнинг энг қиммат трансферлари

5. Диего Костанинг қайтиши

Диего Коста «Атлетико»га қайтди, унинг трансфери учун мадридликлар «Челси»га 66 млн евро тўлаб беришди. Ушбу трансфер бўйича 2017 йил ёзидаёқ келишвга эришиб бўлинган, аммо ФИФА тақиқи туфайли «Атлетико» Диего Коста трансферини фақат 1 январь куни эълон қилолди. Диего ўзига хос тарзда «Челси»да барча билан жанжаллашди, ультиматумлар қўйди ва ниҳоят ўз мақсадига эришди. «Висенте Кальдерон»да уни характери оғир бўлсада, қотил-форвард, натижа келтирадиган ҳужумчи сифатида қадрлашарди. Эндиликда клуб «Ванда Метрополитано»да ўйнамоқда, Коста эса ўзгармаган. Жамоа фанатлари бундай ҳужумчини ёқтиришади. Диего ўз уйига қайтган.

4. Виржийл ван Дейк - дунёнинг энг қиммат ҳимоячиси

«Саутҳемптон» ушбу футболчиси трансфери учун «Ливерпуль»дан 78 млн евро олди.

Кейинги 2 йилда «Ливерпуль» трансфер бозорида тўғри ҳаракатланмоқда. Салоҳ, Мане, Фирмино – бу йигитлар жамоага салоҳиятли иқтидорлар сифатида келишган, аммо уларнинг барчаси ишончни оқлаб, ҳар қандай ҳимояни бузиб ўтувчи машинага айланишган, уларнинг ҳужумкорлиги Гвардиола жамоасини ҳам ожиз қолдирди. «Ливерпуль»да ҳужум чизиғи шунчаки аъло даражада, аммо энди ҳимояни ҳам тартибга келтириш керак эди. Клопп бу муаммони ҳам ҳал қилди – Виржийл ван Дейк катта нарх эвазига бўлсада, жамоа ҳимоясини муносиб тарзда кучайтирди. Ҳозирча уни дунёнинг энг кучли ҳимоячиси деб бўлмайди, аммо у дунёнинг энг қимматбаҳо ҳимоячиси экани факт.

3. Пьер-Эмерик Обамейянг

«Боруссия»дан «Арсенал»га. 63 млн евро эвазига.

У немис клубида иш ташлаш уюштирди, жамоа машғулотларига келмади, келса ҳам кечикиб келди. Бир сўз билан айтганда, ўзини қўйиб юборишларига мажбурлади - унинг «Боруссия»даги даври якунига етганди. Германияда унинг тезлигига голни ҳис қилиш қобилияти қўшилди, унинг зарбалари аниқлиги ошди. Габонлик бу футболчи голларининг 90 фоизидан ортиғини рақиб жарима майдони ичкарисида туриб урган -  Пьер-Эмерик Обамейянг ўз позициясидаги энг яхши ижрочилардан бирига айланди. У сермаҳсулликда оқсаётган «Арсенал» учун энг керакли трансфер бўлди. «Боруссия» унинг трансфери эвазига яхшигина маблағ ва Миши Батшуайини қўлга киритди.

2. Филиппе Коутиньо - Каталонияга янги қон

«Ливерпуль» ҳам ушбу етакчисининг инжиқликлари ортида уни «Барселона»га 120 миллион еврога (бонуслар билан қўшиб ҳисобланганда 160 млн евро) пуллашга мажбур бўлди.

Коутиньо футбол тарихида энг қимматбаҳо қишки трансферга айланди. Юрген Клопп Брендан Рожерснинг ишини давом эттирди ва Коутиньони монстрга айлантирди. Филиппе эса фаолиятида янги давр бошлаш вақти келган деган қарорга келди. Энди унинг гениал голли паслари ва узоқ масофалардан фантастик зарбаларини Испания чемпионатида кузатамиз. У «Энфилд»да етакчи эди, аммо унинг юраги анчадан бери «Барселона» деб ураётганди, у бу ерда катта ғалабаларга эришиши мумкин. «Камп Ноу» Андрес Иньестанинг ўринбосарини қарши олди.

1. Алексис Санчес – Генрих Мхитарян рокировкаси

«Арсенал» ва «Манчестер Юнайтед» ўз футболчиларини алмашиши жараёни қишки трансферлар ойининг энг асосий мавзуси бўлди. Бу трансфернинг ўзига хос жиҳати жамоалар ўз футболчиларини ҳеч қандай қўшимча тўловларсиз, бирга-бир алмашишди. Шартномаси муддати тугашига ҳали бир неча йил бор бўлган Генрих шартномаси тугашига ярим йил қолган Алексис билан алмаштирилди. Арманистонлик футболчи Моуриньо жамоасида ўзига жой топа олмаётганди, Алексис эса совринларга эга чиқишни истади. Санчес Моуриньонинг инжиқ характерида ўзини қанчалик намоён қила олади, Генрих Лондонга келганидан қанчалик мамнун бўлади, буни кўрамиз. Агар улар ўз мақсадларига эришишса бу трансфер –  футбол тарихида кейинги йиллардаги энг ёрқин трансфер келишувига айланиши мумкин.