Alibazar – Ўзбекистондаги янги лойиҳа асосчиси билан бизнес, қизиқарли ғоялар ва ҳаёт ҳақда суҳбат  

Ўзбекистонда энг сара ва сифатли қурилиш молларини сотадиган биринчи онлайн бозор – Alibazar ҳақда эшитган бўлсангиз керак. Иш фаолиятини бошлаганига кўп бўлмаган мазкур лойиҳа юртдошларимизнинг эътиборига тушиб улгурди. Хўш, бу лойиҳа ҳақда нималар биламиз? Унинг асосчиси ким? Ўзбекистон қурилиш бозорида 12 йилдан буён ўз ўрнига эга бўлган “Европол”компанияси ҳамда Alibazar интернет бозори асосчиси Алишер Авазов KUN.UZ таҳририяти меҳмони бўлди.

- Мен 2015 йил малака ошириш мақсадида Америка Қўшма Штатларига бордим. У ерда малака ошириш вақтида вақтдан унумли фойдаланиб, ғоя қидиришни бошладим, - деди А.Авазов. - АҚШ ва Ўзбекистон бозорларини ўрганган ҳолда, мамлакатимизда қурилиш моллари сотадиган онлайн-дўкон яратиш ғояси 2016 йилда келган. Шу йўналишда ишлашни ўзимига мўлжал қилиб олдим. Ва муддат келгач, айнан шу соҳада, шу йўналишда фаолият юритувчи компанияларга ишга кирдим. Мақсад улардан иш ўрганиб, таълим олиш эди.

- 2017 йилга келиб бу борада база шаклланди. Ўзбекистонда жамоа тузиб, шу йўналишда ишлашни бошладим. Мана шу йилнинг январь ойида ишимизни бошлаб юбордик. Alibazar онлайн дўконини нега айнан қурилиш моллари сотишга мўлжалланган, деган саволга жавоб берадиган бўлсам, бунга сабаб, ўзим қурилиш моллари савдоси билан 12 йилдан буён шуғулланаман. Бундан ташқари, бу ғоя Ўзбекистонда янгилик, инновацион ғоя бўлганлиги учун ва энг асосийси мен ўз ишимни яхши кўраман ва қурилиш моллари сотиш менга бегона эмас.

Алишер Авазов лойиҳа номи нега айнан Alibazar деб номлангани ҳақида гапирар экан, жумладан, шундай деди:

- Бу номнинг келиб чиқиши Alibaba’га тақлид эмас. АҚШда юрганимда исмим Алишер бўлганлиги учун америкаликлар унинг талаффузида роса қийналишди. Кейинчалик исмимни қисқартириб, уларга Али деб ўзимни таништира бошладим. У ердагилар мени шу исмда атай бошлашди. Бир дўстим бир ўғил ва бир қизли бўлди ва уларга менинг ҳурматим эвазига Али ва Алия деб исм берди. 2017 йилда мазкур ғоя билан юрганимда бу янгиликдан илҳомландим ва лойиҳа номини Alibazar, яъни “Алининг бозори”, деб номладим.

Алишер Авазов ҳаётда қандай инсон? Ўзи ҳақида сўзлар экан меҳмонимиз қуйидагиларни гапириб берди:

- Мен ҳаётда дўстларимни йўқотишдан, халқимиз ишончини йўқотишдан қўрқаман. Асло пул йўқотишдан қўрқмайман. Чунки 12 ёшимдан буён тадбиркорлик билан шуғулланаётган бўлсам, кўп йўналишда бизнес қилиб кўрдим, кўп йўналишларда ишладим. Бизнесларимиз инқирозга учради, учраганда ҳам қарзлар билан чиқиб кетдик. Фикримча, йўқотишларга учрамаган, адашмаган бизнесмен яхши бизнесмен бўла олмайди. Бу хатолар келажакда ўз ўрнида тўғирланса ва улардан сабоқ олинса, ана шу ютуқ ҳисобланади.