Пхеньян Сеул билан вақтини бирхиллаштириш истагини билдирди

Шимолий Корея етакчиси Ким Чен Ин 27 апрелда Жанубий Корея президенти Мун Чжэ Ин билан ўтган саммитда икки давлатдаги вақтни ягона стандартга келтириш истагини билдирди. Бу ҳақда Жанубий Корея президенти маъмурияти вакили Юн Ён Чхан матбуот анжуманда маълум қилди.  

Ҳозирда Шимолий Кореядаги вақт Жанубий Кореядагидан 30 дақиқа ортда қолади.

“Мен учун Тинчлик уйи деворида бири Сеул вақти, иккинчиси эса Пхеньян вақти учун осилиб турган иккита соатни кўриш жуда қайғулидир. Биз вақт стандартларини ўзгартирганимиз учун энди бошланғич вақтга қайтамиз. Бу ҳақда эълон қилишингиз мумкин”, деб айтган Ким Чен Ин. Унинг сўзларини Юн Ён Чхан келтириб ўтди.