«Русларни уйга қайтаринг». Маргарита Симоньян демография ва Россиянинг мусулмон давлатга айланиши ҳақида гапирди

RT телеканали бош муҳаррири Маргарита Симоньян Донбассда истиқомат қилувчиларга Россия паспортини бериш бошланганига ўз муносабатини билдириб, мамлакатдаги демографик ҳолат ва сиёсат ҳақида гапирди. 

Қуйида унинг телеграм-каналида эълон қилинган пост қисқача таржима қилинган ҳолда келтирилади:

«Беш йилдан бери Донбасс учун фуқаролик ҳақида фиғонларимни эшитган барчага раҳмат. Ақл ғолиб бўлди, раҳм-шафқат ғалаба қозонди, биз зафар қучдик.

Келинг, энди барча руслар учун фуқароликни қўлга киритмагунимизга қадар тўхтамаймиз. Соғлом инсоннинг қарши далиллари қуйидагича:

1. «Замонавий дунёда этник асосда фуқароликни бериш мумкин эмас».

Мумкин. Исроил бермоқда, Германия беряпти, Греция - деярли барча.

Соғлом инсонни Россия бир маданият, тарих, тил, умумий ўтмишга эга одамларни ортга қайтариб олаётгани ғижинтирмайди. Мен буни арман миллатига мансуб шахс сифатида гапиряпман. Ғашини келтирмайди.

2. «Янги одамлар - бюджетга юк».

Бюджетга юк - янги одамларнинг йўқлиги. Ушбу бюджетни шакллантирадиган солиқларни тўлайдиган ва ишлашга қодир бўлганлар. 

Демографик инқироз - Россиянинг асосий иқтисодий муаммоларидан бири. Ечим юзада турибди. Ўттиз йилдан бери турибди. 
 
3. «Руслар қиёфаси остида турли одамлар келади... ўшалар».

Камроқ ўғирлаш керак - улар келмайди. Ҳар қандай тизимни тартибга солиш мумкин - хоҳиш-ирода етарли.

Агар ҳеч нарса ўзгартирилмаса, унда 2040 йилга келиб Россия демография жиҳатидан бутунлай бошқача мамлакат бўлади.

Авваламбор, Россия мусулмон мамлакатга айланади. Бу кўплаб ҳисоб-китоблар билан тасдиқланган тиббий факт. Ислом дини, умуман, бошқа динларга қарши ҳеч қандай фикрда эмасман. Бироқ, тасаввур қилинг - фарзандларингиз сизнинг ёшингизда бўлганида, Ҳабиб Нурмагомедов Россия президентига айланади. Мен унга ҳам қарши фикрда эмасман, лекин Ватанимни ўзим кўраётгандек - маданий, ақлий, ижтимоий ва диний шаклда фарзандларим учун сақлаб қолмоқчиман. Бу - кўплаб конфессиялар ва этнослар яшайдиган дунёвий давлат, сабаби аксарияти рус, православ этноси бу нозик вазиятни сақлаб қолишга имкон беради.

Илтимос, русларни уйга қайтаринг», - дея якун ясаган ўз постига Маргарита Симоньян.

Маълумот учун: Россияда истиқомат қилувчи мусулмонлар сони умумий аҳолининг тахминан 10-15 фоизини ташкил этади.