Пакетларни олиб киришга белгиланган тақиқ бизнес фойдасига қайта кўриб чиқилди

Президентнинг 2018 йил 18 майдаги ПҚ–3730-сон қарорига тегишли тузатишлар киритилди, деб ёзмоқда Norma.
 
Эслатиб ўтамиз, 2019 йил 1 январдан бошлаб ТИФ ТН бўйича 3923 21 000 0, 3923 29 100 0, 3923 29 900 0 кодли маҳсулотларни мамлакатимизга олиб кириш тақиқланган (18.05.2018 йилдаги ПҚ–3730-сон қарорнинг 5-бандига қаранг).
 
Ушбу нормага анча жиддий тузатишлар киритилди:
 
биринчидан, умуман олиб кириш эмас, фақат «эркин муомалага чиқариш (импорт)» божхона режими остида жойлаштириш тақиқланган. Ушбу аниқлаштириш билан бошқа божхона режимларига (Божхона кодексининг 25-моддасига қаранг) жойлаштирган ҳолда амалда олиб киришга рухсат берилган;
 
иккинчидан, тақиқ фақат тутқичи кесилган ёки тутқичли полимер плёнкали пакетларга нисбатан татбиқ этилади. Тегишинча, тутқичсиз, юқорида санаб ўтилган ТИФ ТН кодлари бўйича таснифланадиган пакетларни импорт қилиш мумкин;
 
учинчидан, кўрсатилган товар позицияларининг хўжалик юритувчи субъектлар томонидан ўз ишлаб чиқариш эҳтиёжлари учун, шунингдек гуманитар ёрдам, реклама сифатида ва синов ўтказиш учун импорт қилиниши – тақиқ остига тушмайдиган истисноли ҳолатлар. Аввал бўлганидек, жисмоний шахслар товарлар ва шахсий буюмларини ташиш ва ўраш чоғида ўз эҳтиёжлари учун пакетларни олиб киришлари мумкин.
 
Ҳужжат 24.05.2019 йилдан кучга кирди.