Учта янги қонун маъқулланди, ҳукумат парламентга ҳисоб берди – Сенат ялпи мажлиси суратларда

Олий Мажлис Сенатининг 21-ялпи мажлиси ўз ишининг илк кунида учта қонун лойиҳасини маъқуллади ва ҳукумат ҳисоботини қабул қилди.

Kun.uz мухбирининг хабар беришича, бугун сенаторлар тасдиғидан ўтган қуйидаги қонунлар имзолаш ва эълон қилиш учун президентга юборилади:

– «Хотин-қизлар ва эркаклар учун тенг ҳуқуқ ҳамда имкониятлар кафолатлари тўғрисида»,
– «Хотин-қизларни тазйиқлар ва зўравонликдан ҳимоя қилиш тўғрисида»,
–  «Атом энергиясидан тинчлик мақсадларида фойдаланиш тўғрисида»,

«Она сути билан озиқлантиришни қўллаб-қувватлаш ҳамда гўдаклар ва кичик ёшдаги болалар озиқ-овқат маҳсулотларига доир талаблар тўғрисида»ги қонун лойиҳаси эса рад этилди.

Сенатда, шунингдек, «Фаол инвестициялар ва ижтимоий ривожланиш йили» Давлат дастурининг 2019 йил иккинчи чорагидаги ижроси юзасидан Вазирлар Маҳкамасининг ҳисоботи тингланди.

Ҳисоботни Бош вазир ўринбосари Азиз Абдуҳакимов ўқиб эшиттирди.

Қайд этиш жоиз, мажлиснинг дастлабки кунида 84 нафар сенатор иштирок этди. Мажлиснинг баъзи қисмлари – Сенат раиси Танзила Норбоеванинг кириш нутқи ва ҳукумат вакили Азиз Абдуҳакимовнинг ҳисоботи парламент юқори палатасининг Facebook`даги расмий саҳифасида жонли эфирга узатилди.

Тушдан сўнг Сенат аъзолари президент Шавкат Мирзиёев раислигидаги, ёшларни ватанпарварлик руҳида тарбиялаш ва жамиятда ўқитувчи мавқейини ошириш юзасидан кенгайтирилган видеоселектор йиғилишида қатнашиш учун йўл олишди.

Эртага, 24 август куни айрим қонун ҳужжатларига тегишли ўзгартиш ва қўшимчалар киритишни назарда тутувчи 7та қонун лойиҳаси, 4та халқаро ҳужжатларнинг Ўзбекистон томонидан қабул қилиниши бўйича қонунлар ва Сенат ваколатига кирувчи бошқа масалалар кўриб чиқилади.

Шунингдек, ялпи мажлиснинг иккинчи кунида Ички ишлар ва Ташқи ишлар вазирлари, Туризмни ривожлантириш давлат қўмитаси раисининг ахборотлари, Хоразм вилояти ҳокимининг ҳисоботи эшитилади.

Kun.uz, ўз анъанасига мувофиқ, Ўзбекистон қонун чиқарувчи ҳокимиятининг олий органида ўтган ялпи мажлисдан эксклюзив суратларни тақдим этади.