Коронавирус қурбонларини “ортиқча юк” деб атаган Молдованинг бош эпидемиологи истеъфога чиқди

Николае Фуртунэ 7 сентябрь куни телеэфирда қилган чиқиши чоғида "коронавирус ўзи ва атрофдагилар учун ортиқча юк бўлганларни олиб кетгани"ни айтганди.

Фото: World Health Organization in Moldova

Молдованинг бош эпидемиологи, жамоат соғлиғини сақлаш миллий агентлиги директори Николае Фуртунэ коронавирус қурбонлари тўғрисида номаъқул сўзларни айтгани учун истеъфога чиқди. Бу ҳақда мамлакат ҳукумати матбуот хизмати хабар берди.

"Бош вазир Ион Кику жамоат соғлиғини сақлаш миллий агентлиги директори Николае Фуртунэни ҳузурига таклиф қилди, суҳбат чоғида Николае Фуртунэ ўз истеъфоси ҳақида эълон қилди", - дейилади хабарда.

Агентлик директори вазифасини бажарувчи этиб унинг ўринбосари Василий Гуштюк тайинланган.

Фуртунэ 7 сентябрь куни телеэфирда қилган чиқиши чоғида "коронавирус ўзи ва атрофдагилар учун ортиқча юк бўлганларни олиб кетгани"ни айтганди.

"Сурбет кўринмоқчи эмасман, аммо бутун дунёда COVID-19 атрофдагилар учун ортиқча юк бўлганларни олиб кетди. Бу инсонлар саратоннинг, диабетнинг сўнгги босқичларидан азоб чекаётган, юрак-қон томир касалликлари бўлганлар эди. Бу Италия, Франция ва афсуски, Молдовада содир бўлди", - деганди Фуртунэ.

У эртаси куни бу сўзлари учун узр сўраб, уни нотўғри тушунишганини айтди, бироқ президент ва ҳукумат ундан истеъфога чиқишни талаб қилди.

Молдовада касаллик юқтирганлар сони 40 мингдан ошган, 1074 киши вафот этган.

#Молдова #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.