70та қашшоқ мамлакат аҳолисининг катта қисми коронавирусга қарши эмланиш имконига эга эмаслиги маълум қилинди

Pfizer компаниясининг 96 фоиз вакцинасини ғарб давлатлари сотиб олган. Moderna вакцинасини ҳам ривожланган давлатларгина сотиб олиши мумкин ва ҳар икки компания вакциналари нархи қиммат.

Фото: EPA

70та қашшоқ мамлакат сотиб олган коронавирусга қарши вакцина улар аҳолисининг 10 фоизини эмлашга етади. Бу ҳақда Amnesty International ташкилоти маълум қилди.

Қайд этилишича, Ер аҳолисининг 14 фоизи яшайдиган ривожланган мамлакатлар ўзларини истиқболли вакциналар билан аллақачон таъминлаб бўлди.

Айни вақтда 70та қашшоқ мамлакатда яшовчи ҳар ўн кишидан тўққиз нафари келаси йили коронавирусга қарши эмланмайди, чунки вакцинанинг катта қисми сотиб олиб бўлинган.

Миллиардер Билл Гейтс вакциналар барча мамлакатларга, айниқса унчалик ривожланмаган мамлакатларга адолатли тарзда тақсимланиши учун кўп иш қилиш кераклигини, вакцинага эга бўлиш бойлик даражасига боғлиқ бўлмаслиги кераклигини айтганди.

Аввалроқ Канада ҳар бир фуқароси учун тўрт дозадан COVID-вакцина сотиб олгани хабар қилинганди.

#Вакцина #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.