Наманган шаҳрига янги ҳоким тайинланди
Президентнинг Наманган шаҳридаги Бунёдкор маҳалласига ташрифи ортидан, шаҳар ҳокими ишдан олинди. Олимжон Исаевнинг ўрнини Тошкент шаҳри ҳокими ўринбосари Ғофир Жамолов эгаллади.
23 февраль куни халқ депутатлари Наманган шаҳар кенгашининг навбатдан ташқари сессияси бўлиб ўтди. Бу ҳақда Kun.uz мухбири хабар бермоқда.
Сессияда туманни иқтисодий-ижтимоий ривожлантиришдаги муаммолар муҳокама қилинди ва ташкилий масала кўрилди.
Вилоят ҳокими Шавкатжон Абдураззоқов туман ҳокимлигига шу пайтга қадар Тошкент шаҳар ҳокимининг ўринбосари – уй-жой коммунал хизмат кўрсатиш бош бошқармаси бошлиғи бўлиб ишлаб келган Ғофир Жамолов номзодини таклиф қилди.
Депутатлар ва фаоллар номзодни маъқуллади, у ҳақдаги фикрларини билдирди.
Ғофир Жамолов 1974 йилда Наманган шаҳрида туғилган. 1997 йилда Наманган саноат-технология институтини, 2006 йилда Ўзбекистон Республикаси Президенти ҳузуридаги Давлат ва жамият қурилиши академиясини тамомлаган.
1997-2009 йиллар давомида Наманган шаҳар ва Наманган вилояти ҳокимликларида турли масъул лавозимларда меҳнат қилган.
2009-2020 йилларда Ўзбекистон Республикаси Иқтисодиёт вазирлиги Демография ва меҳнат бозори бўлими бош мутахассиси, бўлими бошлиғи, Ўзбекистон Республикаси уй-жой, коммунал хизмат вазирининг ўринбосари бўлиб ишлаган.
2020 йилдан шу кунга қадар Тошкент шаҳар ҳокимининг ўринбосари – уй-жой коммунал хизмат кўрсатиш бош бошқармаси бошлиғи сифатида фаолият юритган.
Наманган шаҳрини бир йилдан буён «Ўзагрокимёҳимоя» АЖнинг собиқ раиси Олимжон Исаев бошқариб келаётганди.
Ўтган ҳафта президент Шавкат Мирзиёев Наманганга ташрифи чоғида шаҳарнинг Бунёдкор маҳалласида бўлиб, маҳалладаги инфратузилма ҳолати юзасидан шаҳар ҳокими ва сектор раҳбари – прокурорга танбеҳ берган эди.
Шундан сўнг маҳаллада ободонлаштириш ишлари бошланди. Вилоят ҳокими Шавкатжон Абдураззоқов шу маҳаллага контейнер ўрнатиб, унда яшашини эълон қилди.
- Бугун, шунингдек, Ташқи меҳнат миграцияси агентлиги директори Муҳаммадзокир Маматхонов Наманган вилояти Уйчи туманига ҳоким этиб тасдиқланди.
Мавзуга оид
21:18 / 08.09.2024
Отабек Умаров Осиё Олимпия Кенгашининг минтақавий вице-президенти бўлди
19:01 / 03.09.2024
Президент йиғилишида ишдан олинган Мингбулоқ тумани ҳокими янги лавозимга тайинланди
15:52 / 27.08.2024
Тўрақўрғон туманига янги ҳоким тайинланди
12:30 / 18.08.2024