Италия – Испания, Бельгия Францияга қарши. УЕФА Миллатлар лигаси яримфинал анонси

Бугун, 6 октябрдан эътиборан ФИФА кунлари доирасида миллий жамоалар учрашувлари бошланади. Европада ЖЧ-2022 саралаш баҳсларидан олдин УЕФА Миллатлар лигасининг ҳал қилувчи учрашувлари ўтказилади. Яримфинал доирасида Италия Испанияга қарши саф тортса, Бельгия Францияга қарши ўйинда финал йўлланмаси учун курашади.

Испания Евро-2020даги мағлубият учун реванш ололадими?

Турнирнинг дастлабки яримфинал жуфтлигида азалий рақиблар ўзаро тўқнаш келади. «Мовий гвардия» «қизил фурия»ни ўз майдонида қабул қилади. Чоршанба оқшомидаги бир ўйиндан иборат яримфинал баҳсида Луис Энрике мураббийлигидаги испанлар Евро-2020даги аламли мағлубият учун Роберто Манчини шогирдларидан реванш олиш илинжида тўп суришади. 6 июль куни Лондонда ўтган Евро-2020 яримфинал баҳсининг асосий вақти 1:1 ҳисобидаги дуранг билан якунланган, пенальтилар сериясида эса итальянлар испанлардан омадлироқ чиққанди – 4:2. Бу сафар ким финалга муносиброқ бўлади, кўрамиз.

Қайд этиш жоиз, ушбу ҳал қилувчи баҳслар Миландаги «Сан-Сиро» ва Туриндаги «Ювентус стэдиум»да ўтказилади.

Миллатлар лигаси. Яримфинал.

6 октябрь (чоршанба)

ИТАЛИЯ – ИСПАНИЯ

Ўйин бошланиш вақти: 23:45

Стадион: Милан, «Сан-Сиро»

Тахминий таркиблар:

Италия: Доннарумма; Ди Лоренцо, Бонуччи, Кьеллини, Эмерсон; Барелла, Жоржиньо, Верратти; Кьеза, Распадори, Инсинье

Испания: Унай Симон; Аспиликуэта, Ляпорт, Пау Торрес, Регилон; Коке, Бускетс, Форнальс; Ферран Торрес, Оярсабаль, Сарабия.

Италиянинг мусобақадаги натижалари:

A1 гуруҳи ғолиби: Ғ-3 Д-3 М-0

Энг яхши тўпурари: Доменико Берарди - 2

04.09: Италия – Босния  ва Герцеговина 1:1

07.09: Нидерландия – Италия  0:1

11.10: Польша – Италия  0:0

14.10: Италия – Нидерландия 1:1

15.11: Италия – Польша  2:0

18.11: Босния ва Герцеговина – Италия 0:2

Испаниянинг мусобақадаги натижалари:

A4 гуруҳи ғолиби: Ғ-3 Д-2 М-1

Энг яхши тўпурари: Ферран Торрес - 4

03.09: Германия - Испания 1:1

06.09: Испания - Украина 4:0

10.10: Испания - Швейцария 1:0

13.10: Украина - Испания 1:0

14.11: Швейцария - Испания 1:1

17.11: Испания - Германия 6:0

Бельгия ЖЧ-2018даги мағлубият аламини ололадими?

Юлдузли таркибга эга Бельгия миллий жамоасини Россияда ўтган ЖЧ-2018да Франция миллий жамоаси турнирдан чиқариб юборганди. Ўшанда ҳам Роберто Мартинез шогирдлари Дидье Дешам бошқарувидаги французларга қарши яримфиналда тўп суриб, Умтитининг ягона голи эвазига мундиал билан хайрлашишганди.

Де Брюйне, Лукаку, Азар етакчилигидаги бельгияликлар ўша мағлубият ўчини олиш имкониятига эга. Зеро, Франция миллий жамоаси жаҳон чемпиони бўлгач, аввалги мавқеида эмаслиги Евро-2020да кўринди. «Уч ранглилар» охирги 6 ўйиндан бор йўғи биттасида ғалаба қозона олишди, ўшанда ҳам Финландия мағлуб этилди. «Қизил иблислар» эса охирги 10та ўйиндан 8тасида ғалаба, битта дуранг ва фақат бир марта мағлуб бўлишди – Евро-2020 чоракфиналида амалдаги Европа чемпиони Италияга (1:2). Шундай экан, Роберто Мартинез мураббийлигидаги Бельгия миллий жамоаси якшанба куни ўтадиган турнир финалида тўп суриш учун яхши имкониятга эга.

Миллатлар лигаси. Яримфинал.

7 октябрь (пайшанба)

БЕЛЬГИЯ – ФРАНЦИЯ  

Ўйин бошланиш вақти: 23:45

Стадион: Турин, «Ювентус стэдиум»

Тахминий таркиблар:

Бельгия: Куртуа; Алдервейрелд, Денайер, Вертонген; Кастань, Витсель, Тилеманс, Торган Азар; де Брюйне, Лукаку, Эден Азар

Франция: Льорис, Упамекано, Варан, Кимпембе; Павар, Погба, Рабьо, Динь; Гризманн; Мбаппе, Бензема

Бельгиянинг мусобақадаги натижалари:

A2 гуруҳи ғолиби: Ғ-5 Д-0 М-1

Энг яхши тўпурари: Ромелу Лукаку - 5 гол

05.09: Дания - Бельгия 0:2

08.09: Бельгия - Исландия 5:1

11.10: Англия - Бельгия 2:1

14.10: Исландия - Бельгия 1:2

15.11: Бельгия - Англия 2:0

18.11: Бельгия - Дания 4:2

Франциянинг мусобақадаги натижалари:

A3 гуруҳи ғолиби: Ғ-5 Д-1 М-0

Энг яхши тўпурар: Оливье Жиру - 3

05.09: Швеция - Франция 0:1

08.09: Франция - Хорватия 4:2

11.10: Франция - Португалия 0:0

14.10: Хорватия - Франция 1:2

14.11: Португалия - Франция 0:1

17.11: Франция - Швеция 4:2

Миллатлар лигаси анонси:

3-ўрин учун ўйин.

10 октябрь (якшанба)

«Ювентус стэдиум», Турин.

Финал

10 октябрь (якшанба)

«Сан-Сиро», Милан.