Сакен Полатов Бокс федерациясининг янги маслаҳатчисини таништирди

Кубадаги замонавий бокс мактабининг асосчиси Карлос Вилянуева бу соҳада ярим асрлик тажрибага эга. Унинг шогирдлари орасида кўплаб жаҳон чемпионлари ва Олимпия ўйинлари совриндорлари бор ҳамда Куба терма жамоаси бош мураббийи Роландо Aсебал уни ўзининг устози деб атайди. 

Янги маслаҳатчи олдида маҳаллий бокс тизимини ўрганиб чиқиб, илмий таҳлиллар асосида спортчиларни тайёрлаш бўйича ягона услубий қўлланма яратиш каби жуда катта вазифа турибди. Миллий олимпия қўмитаси раиси ўринбосари, Ўзбекистон бокс федерацияси раисининг биринчи ўринбосари Сакен Пўлатов ташаббуси билан ташкил этилган йиғилишда мазкур лойиҳа ЎзДЖТСУ профессор-ўқитувчилари ва доцентлари билан муҳокама қилинди. 

Воқеани шарҳлар экан, Сакен Пўлатов шундай деди: “Бир ой олдин давлатимиз раҳбари спортни оммалаштириш ва спорт таълимини такомиллаштиришга бағишланган катта йиғилиш ўтказди. Спорт раҳбарияти олдига қўйилган мақсадлар ниҳоятда аниқ: туғма қобилият соҳибларни тарбиялашдан тизимли равишда чемпионларни тайёрлашга ўтиш. Сўнгги пайтларда ҳудудларга қилган ташрифларимиз шуни кўрсатдики, аксарият муассасаларда бундай тизим қурилмаган, шунинг учун марказлашган кўмаксиз бунинг уддасидан чиқиб бўлмайди. Ва биз, албатта, нафақат ёрдам берамиз, балки ўзимиз ҳам ушбу лойиҳада 100% иштирок этамиз, чунки натижалар бизга узоқ келажакда эмас, балки ўрта муддатли истиқболда керак”. 

Шунингдек, Ўзбекистонда боксчиларни тайёрлашнинг Миллий стандарти ишлаб чиқилиши, уни Болалар ва ўсмирлар спорт мактаблари, бокс мактаблари ва олимпия захиралари коллежларида жорий этиш режалаштирилгани маълум бўлди. Бу янги юлдуз номларини кашф қилувчи самарали танлов учун қўшимча рағбат беради.

Ⓣ