Ўзбекистон ва Озарбойжон қўшма инвестиция жамғармасини ташкил этишга келишиб олди

Томонлар нефть-газ, кимё саноати, тўқимачилик ва қишлоқ хўжалиги соҳасида қиймати 500 млн доллардан ортиқ бўлган 87 та қўшма лойиҳа ва савдо шартномаларини ўз вақтида ва сифатли амалга ошириш бўйича саъй-ҳаракатларни кучайтиришга келишиб олди.

Мулоқот давомида томонлар Ўзбекистон-Озарбойжон инвестиция жамғармасини ташкил қилиш ташаббусини амалга оширишни давом эттириш ниятида эканини тасдиқлади ва шу муносабат билан қисқа вақт ичида унинг фаолиятини ташкил этиш бўйича «Йўл харитаси»ни шакллантиришга, тегишли ҳукуматлараро битимни ишлаб чиқишни бошлашга келишиб олди.

Транспорт ва логистика алоқаларини мустаҳкамлаш истиқболларини муҳокама қилиш чоғида музокаралар иштирокчилари Ўзбекистон ва Озарбойжон ўртасида халқаро автомобиль транспорти тўғрисидаги ҳукуматлараро битим доирасида амалий чора-тадбирлар қабул қилишни жадаллаштиришга, «Каспар» паромларида Каспий денгизи орқали Ўзбекистон учун товарлар ортилган вагонларни ташишни тезлаштиришга келишди.

Алоҳида тартибда томонлар жорий йил ноябрь ойида Тошкентда миллий товарлар кўргазмасини ташкил қилиш, Ўзбекистон ва Озарбойжон ҳудудлари биринчи форумини юқори даражада ўтказишни назарда тутган ҳолда ҳудудлараро ҳамкорликни кенгайтириш истиқболларини муҳокама қилди. Форумга тайёргарлик кўриш доирасида инвестиция лойиҳалари пакетини ҳамда ҳудудлар ўртасидаги ҳамкорликни ривожлантириш бўйича аниқ таклифлар ишлаб чиқилади.