Истанбулдаги терактда гумонланган аёл қўлга олинди. Сўнгги маълумотлар

Туркия полицияси Истанбул шаҳри марказидаги Истиқлол кўчасида портлаш содир этишда гумонланган шахсни қўлга олди. Бу ҳақда Туркия ички ишлар вазири Сулаймон Сойлу маълум қилди.

Вазирнинг айтишича, Суриядаги террорчилик гуруҳи портлашга алоқадорликда гумонланмоқда - ОАВ гап Курдистон ишчи партияси ҳақида кетаётганини тахмин қилган.

«Терговда террорчилик ҳужуми излари Сурияга олиб бораётгани ва бунда Анқара томонидан террорчи сифатида тан олинган гуруҳлар иштирок этгани бўйича далиллар бор. Бизнинг маълумотларга кўра, теракт амалга ошириш буйруғи Кобанидан бўлган, ҳужум ижрочиси эса Суриянинг Африн шаҳридан келган», — дея Сойлунинг сўзларини келтирган TRT Haber телеканали.

Вазир жами 21 киши, жумладан бомба ўрнатган шахс қўлга олинганини маълум қилган. «Яқин вақтлар ичида бизга бу оғриқни келтирганларга биз ортиғи билан қайтарамиз», — дея қўшимча қилган Сойлу. 

Мамлакат вице-президенти Фуат Ўқтой Туркия ҳукумати 13 ноябр куни Истанбулда рўй берган портлаш теракт сифатида баҳолаётганини маълум қилган.

Терактдан кейин Туркия ҳукумати ОАВга портлаш ҳақида янгиликлар, воқеа жойидан кадрлар, портлаш сабаблари ва гумонланувчилар бўйича версияларни норасмий манбаларга асосланган ҳолда тарқатишни тақиқлаган.

«Қабиҳона ҳужум»

Якшанба куни Туркия президенти Ражаб Тоййиб Эрдўған Истанбул марказидаги Тақсим майдони ҳудудида олти киши ўлимига ва ўнлаб кишилар жароҳат олишига сабаб бўлган портлашни қоралаганди.

«Давлатимизнинг тегишли бўлинмалари ушбу қабиҳона ҳужум учун айбдорларни қидириш устида ишламоқда», деди Эрдўған Туркия телеканаллари томонидан жонли трансляция қилинган матбуот анжуманида.

Портлаш сайёҳлар ва маҳаллий аҳоли орасида машҳур бўлган Истиқлол кўчасида содир этилди. Туркия вице-президенти Фуат Ўқтой ҳужум ижрочиси аёл киши эканини айтганди.

«Ҳужумни амалга оширган шахс аёл киши бўлган, у бомбани портлатган. Бу террорчилик акти содир этилганини кўрсатади. Портлаш оқибатида олти киши ҳалок бўлди. Яраланганлар сони 81 нафарга етди», деган у.

Сўнгги маълумотларга кўра, 81 кишидан 50 кишига жавоб берилган, беш киши жонлантириш бўлимида, уларнинг икки нафари оғир аҳволда қолмоқда. 

Ўқтойнинг сўзларига кўра, тўрт киши воқеа жойида ҳалок бўлган, шифохонада яна икки кишининг жони узилган. Туркия Бош прокуратурасининг 14 нафар терговчиси, шунингдек суд тиббиёт экспертлари тергов ҳаракатларига жалб этилган.

«Бунинг ортида ким турган бўлмасин, мамлакат ичкарисида ёки дунёнинг исталган бурчагида бўлса ҳам биз уларга етиб борамиз. Бу одамлар Туркияга олиб келинади, судга тортилади ва жазоланади», деган Ўқтой.

Теракт учун жавобгарлар ҳақида Эрдўған ҳам матбуот анжумани давомида тўхталган. У ҳам кескин оҳангда айбдорлар жазоланишига ваъда берган.

«Рўй берган ҳодиса айбдорлари ўзларига муносиб жазони олишади. Терроризм орқали Туркияни ва турк миллатини эгаллашга бўлган уринишлар бугун ҳам, эртага ҳам ўз мақсадига эриша олмайди», деган у.

Туркия адлия вазирлиги Истанбулдаги теракт доирасида 46 киши қўлга олинганини маълум қилди. 

Туркия ички ишлар вазирлиги АҚШ элчихонасининг Истанбулдаги теракт бўйича таъзияномасини қабул қилмаслигини маълум қилди. Туркия ички ишлар вазирининг сўзларига кўра, ҳукумат бу теракт қаердан туриб мувофиқлаштирилган бўлиши мумкинлигини билади. 

АҚШ манзилига қаратилган бундай баёнот Қўшма Шататлар Сурия шимолидаги курд тузилмаларини қўллаши билан боғлиқ. Истанбул полицияси теракт ижрочиси сифатида гумон қилиниб қўлга олинган Ахлам Албашир Суриянинг Африн шаҳридан эканини маълум қилган.

Портлаш тафсилотлари

Истанбул губернатори Али Ерлиқоя портлаш маҳаллий вақт билан соат 16:20 да содир этилганини маълум қилганди.

Воқеа жойига зудлик билан полиция отрядлари, тез ёрдам машиналари, ўт ўчирувчилар ва бошқа фавқулодда хизматлар етиб келган.

Ижтимоий тармоқларда тарқалган видеоёзувларда одамлар кўплаб ресторан ва дўконлар жойлашган Истиқлол кўчаси бўйлаб чопиб кетаётгани акс этган.

Тақсим майдони ва Истиқлол кўчаси Истанбулнинг сайёҳлар орасида машҳур ва доимий равишда одамлар билан гавжум бўладиган ҳудудлари саналади.

Воқеа жойида олинган видеороликларда портлаш оқибатида яраланиб ёки гангиб қолган ҳолда ерда ўтирган одамлар ҳам кўринади.

Роликлардан, шунингдек мухбирларнинг хабарларидан билиш мумкинки, портлаш овози узоқлардан ҳам эшитилган, портлаш жойида эса аланга кўтарилган.

Тасвирларда шунингдек портлаш рўй берган жойда кенг ўра пайдо бўлгани, атрофида бир неча киши жасади ётгани кўринади.

Портлаш ҳудудидаги барча одамлар эвакуация қилинган, воқеа жой ўраб олинган.

Ўзбекистон томони муносабати

Ўзбекистоннинг Истанбулдаги Бош консулхонаси Истанбулдаги портлаш оқибатида жабрланганлар орасида Ўзбекистон фуқаролари мавжудлиги ҳақида маълумот йўқлигини маълум қилди.

Кейинроқ портлаш оқибатида Ўзбекистон фуқароси бўлган блогер, жамоатчилик фаоли Ислам Капарзо ҳам жабрлангани маълум бўлди. Бу ҳақда унинг ўзи ижтимоий тармоқдаги саҳифасида ёзиб қолдирган. «Озгина жароҳатландим, лекин ҳалокатли эмас, ҳаётман», — деган у.

Президент Шавкат Мирзиёев Бейўғли туманидаги Истиқлол кўчасида юз берган ушбу портлаш оқибатида кўплаб инсонлар қурбон бўлгани ва жиддий жароҳат олгани муносабати билан Туркия президенти Ражаб Тоййиб Эрдўғанга таъзия йўллади.

«Давлатимиз раҳбари вафот этганларнинг оила аъзолари ҳамда яқинларига таскин-тасалли ва бардамлик, жароҳат олганлар тез фурсатда соғайиб кетишини тилади», дейилади президент матбуот хизмати хабарида.

Истиқлол кўчасида аввал ҳам 2015-2016 йилларда қатор терактлар амалга оширилган, бу ҳужумларнинг барчаси учун жавобгарликни ИШИД гуруҳи зиммасига олган.

Истанбулдаги сўнгги йирик теракт 2017 йил 1 январига ўтар кечаси содир этилган, ўшанда Калашников автомати билан қуролланган шахс Босфор соҳилидаги тунги клубга бостириб кирган ва у ердаги кишиларни ўққа тутганди. Ҳужум оқибатида 39 киши ҳалок бўлиб, 69 киши яраланганди.