Бахмут мудофааси давом этмоқда, «вагнерчилар» асир тушмоқда. Уруш суратлари

Украинада урушнинг 382-куни ўтди. Асосий маълумотлар:

Москва областидан сафарбар қилинганларнинг қариндошлари Владимир Путин ва Сергей Шойгуга мурожаат йўллаб, зарур тайёргарлик ва қуролларсиз олдинги чизиққа юборилган ҳарбий хизматчиларни штурмчи бўлинмалардан қайтариб олишни сўрашди.
Американинг ядро қуролини олиб юришга қодир бомбардимончи самолёти Болтиқ денгизи устида Санкт-Петербург йўналишида учиб, манёвр амалга оширди. Самолёт Полша, Эстония, Латвия ва Литва устидан учган, Фин бўғозидаги Гогланд ороли яқинида бурилган ва Буюк Британия томон учиб кетган.
Володимир Зеленский кечки видеомурожаатида ўтган ҳафтада Бахмут атрофида 1100 нафар россиялик ҳарбий ҳалок бўлгани, яна 1500 нафари яраланганини айтди. РФ мудофаа вазирлиги бу маълумотга изоҳ бермаган.
Швейцария Британия томонидан ишлаб чиқарилган Rapier русумли 60 та эски зенит-ракета комплексларини утилизация қилишни режалаштирмоқда. Маҳаллий журналистлар фикрича, уларни Украинага бериш ҳам мумкин бўлган, аммо Швейцария президенти тўлиқ бетарафлик сиёсатига содиқ ва урушни музокаралар йўли билан тўхтатиш тарафдори ҳисобланади.

Кун кадри. «Вагнер» ХҲК ёлланма жангчиси украин асирлигида

«Вагнер» ХҲК ёлланма жангчиси Украина қуролли кучлари тергов хонасида. Асир тушган «вагнерчилар»нинг аниқ сони маълум эмас. Компания раҳбари Евгений Пригожин бу мавзуда охирги бор украинларга асир тушган ёлланма жангчининг «кувалда» билан уриб ўлдирилиши акс этган видео тарқалганидан буён муносабат бермаган (ўшанда Пригожин роликни сериалга қиёслаганди). Феврал ойи ўрталарида асирликка тушган икки россиялик ҳарбий «Вагнер» учун ишлагани, РФ армияси улкан йўқотишларга учраётгани ва ёлланма жангчилар ўз командирлари томонидан отиб ташланиши ҳақида айтиб берганди. Россия томони бу маълумотга изоҳ бермаган.

Бахмут атрофидаги украин аскарлари

Кўплаб ҳарбий экспертлар февралдаёқ Украина қўшини «яқин ҳафталарда» Бахмутни ташлаб чиқишини тахмин қилган бўлса-да, Донецк областидаги бу шаҳар мудофааси давом эттирилмоқда. «РБК-Украина» нашри ёзишича, Бахмут атрофидаги украин ҳарбийларининг асосий вазифаси — Россия қўшинини ҳолдан тойдириш ҳамда уларни шахсий таркиб ва ҳарбий техникалар бўйича имкон қадар кўпроқ йўқотишлар беришга мажбур қилиш ҳисобланади. Нашрнинг қайд этишича, бундай тактика РФ армиясига муваффақиятли юриш қилиш ва бошқа йўналишларда мудофаани мустаҳкамлашга имкон бермайди, Украина армияси эса шу тарзда нафақат шаҳарни ҳимоя қилади, балки қарши ҳужумга тайёрланади.

Шаҳарни штурм қилишда иштирок этаётган «Вагнер» ХҲК раҳбари Евгений Пригожин ҳам Бахмут атрофида РФ армияси учун юзага келган оғир вазият ҳақида гапирган. Унинг сўзларига кўра, «украинлар бу шаҳар ҳимоясига туганмас захираларини олиб келмоқда».

Володимир Зеленский 12 март куни кечқурунги видеомурожаатида Россия қўшинининг Бахмут атрофида сўнгги ҳафта давомида берган йўқотишларига тўхталди. Украина президенти тасдиқлашича, бу муддат ичида РФ армиясининг 1100 аскари ҳалок бўлиб, 1500 аскар яраланган. Россия томони бу рақамларга изоҳ бермаган.

Қуйида Украина қуролли кучларининг Бахмут атрофидаги позициялари акс этган суратлар.