Байден: АҚШ ўзининг кимёвий қурол захираларини йўқ қилди

АҚШ президенти Жо Байден мамлакатдаги кимёвий қурол захиралари тўлиқ йўқ қилинганини маълум қилди. Унинг баёноти 7 июль, жума куни Оқ уйнинг расмий сайтида эълон қилинган.

Вашингтонда таъкидланишича, мамлакатдаги кимёвий қурол захираларини йўқ қилиш жараёни 30 йилдан ортиқ давом этган. Байден Кимёвий қуролларни тақиқлаш ташкилотини (КҚТТ) қўллаб-қувватлашга ваъда берди ва Оммавий қирғин қуролларини тақиқлаш бўйича конвенцияга қўшилишга чақирди. Шу билан бирга, АҚШ президенти Россия ва Сурияни конвенцияни бузганликда айблаб, бу давлатлар унга риоя қилишга қайтиши ва «ўз ҳужумлари учун қўлланилган эълон қилинмаган дастурларини тан олиши» кераклигини айтди.

Ўз навбатида, КҚТТ АҚШни кимёвий қуролга эга охирги давлат деб ҳисоблаган. Ташкилот ушбу турдаги қуролларнинг АҚШда йўқ қилинганини тасдиқлаб, бу «барча кимёвий қуролларни бутунлай йўқ қилиш мақсадига эришиш йўлидаги муҳим қадам» эканини таъкидлади. 

Кимёвий қуроллар бўйича конвенцияга ҳали тўрт давлат қўшилмаган, дейди КҚТТ. Бундан ташқари, «ташланган ва эски кимёвий қуролларни» йўқ қилиш керак, дея таъкидлади ташкилот.