«Арсенал» янги трансферини эълон қилди

«Арсенал» «Аякс» ҳимоячиси Юрриен Тимберни трансфер қилди.

22 ёшли нидерланд «канонирлар» билан 5 йиллик шартномага имзо чекди.

У янги жамоасида 12-рақам остида тўп суради.

Аввалроқ, Лондон клуби ушбу ўнг қанот ҳимоячиси учун 40 миллион евро трансфер пули тўлаши ҳақида хабар қилинганди.

Тимбер «Аякс» академияси тарбияланувчиси ҳисобланади. У Амстердам жамоаси сафида 121 ўйинда майдонга тушиб, 6 гол урган ва 4 голга узатма берган.

Transfermarkt портали унинг трансфер қийматини 42 миллион еврога баҳолаган.

Бу «Арсенал»нинг ёзги трансферлардаги иккинчи хариди бўлди. Бундан аввалроқ «Челси»дан ҳужумкор яримҳимоячи Кай Ҳаверц 71 млн еврога сотиб олинганди.

Шунингдек, «Вест Ҳэм»дан таянч яримҳимоячиси Деклан Райсни трансфер қилиш масаласи ҳал бўлган. Англия миллий жамоасига номзод бўлган ушбу футболчи учун Лондон клуби камида 105 млн фунт тўлаши хабар қилинган.