Новосибирскда иссиқлик тармоқларидаги авариялар сабабли фавқулодда ҳолат жорий этилди

Новосибирск вилояти ҳокимияти яқинда иссиқлик тармоқларида бир нечта бахтсиз ҳодисалар содир бўлган вилоят марказида фавқулодда ҳолат жорий қилди. Бу ҳақда губернатор Андрей Травников 19 январ, жума куни фавқулодда вазиятлар бўйича вилоят комиссиясининг навбатдан ташқари йиғилишида маълум қилди.

Минтақа раҳбари сўзларига кўра, Новосибирскнинг Ленин тумани иссиқлик таъминоти тизимидаги авария зонасида «воқеа ёмон сценарий бўйича ривожланмоқда». Тизимни тўлдиришда Петропавловская кўчасида янги қувур нуқсони аниқланди. Маҳаллий матбуотнинг ёзишича, шаҳар ўнг қирғоғидаги айрим уйлар иссиқликсиз қолган.

«24 соат ичида учинчи авария»

«Сўнгги 24 соат ичида бу шаҳарнинг ушбу массивида учинчи авариядир. Шу сабабли Ленин туманида жойлашган уйларда иссиқлик етказиб бериш ва нормал иссиқлик таъминотини тиклаш тўхтатилмоқда», - деб ёзди Травников Telegram-каналда.

Унинг қўшимча қилишича, фавқулодда вазиятларни бартараф этиш маркази бошқаруви минтақа даражасига ўтказилган ва унга губернатор ўринбосари Сергей Семка раҳбарлик қилади. Навбатдаги аварияни бартараф этиш ишлари Сибир ишлаб чиқариш компанияси хизматлари томонидан олиб борилмоқда. 

Коммунал авариялар 

Охирги икки ҳафта ичида Новосибирскда бир қатор йирик коммунал авариялар юз берди. 11 ва 17 январ кунлари содир бўлган ҳодисалар туфайли шаҳарнинг чап қирғоқ қисмидаги уйлар иссиқлик ва иссиқ сувсиз қолган. Новосибирск мэрияси маълумотларига кўра, ҳозирда 159 та уйда иссиқлик таъминоти фавқулодда, яна 6 тасида эса режали тарзда тўхтатилган. 20 январ куни эрталаб уйларнинг аксариятига иссиқлик етказиб бериш тикланиши мумкин.

Бир кун аввал шаҳар ҳокимияти гайд-паркда иссиқлик узилишларига қарши митингни тақиқлади, деб ёзади «Сибирь.Реалии» нашри. Тақиқ «тадбир фуқаро ҳуқуқлари, қонунийлик, ҳуқуқ-тартибот ва жамоат хавфсизлигига, шу жумладан конституциявий тузум асосларига таҳдид солиши» билан изоҳланган.