Лукашенко патрулларни ўқотар қурол билан таъминлашни буюрди

Беларус раҳбари Александр Лукашенко милиция пост хизматининг кўча патрулларини ўқотар қуроллар билан қуроллантиришни буюрди. «Ҳеч бўлмаганда тўппонча билан. Ва бу ҳақда ҳамма билиши керак. Улар кўчада хотиржам юриши керак», деди Лукашенко 20 феврал куни хавфсизлик кучлари билан кенгайтирилган йиғилишда.

Мақсад, дейди у, жиноятчиликни камайтириш. Шу билан бирга, кўчаларда қуролланган милиционерлар фуқароларга «куннинг исталган вақтида уйда, ишда, кўчада ўзини хавфсиз ҳис қилишига имкон беради», дея қўшимча қилди Беларус раҳбари. 

Лукашенко бир қанча бўлимларга ушбу буйруқ ижросини назорат қилишни топширди. «Ички ишлар вазирлиги, КГБ, махсус хизматлар, ҳамма, прокуратура... назоратга олиши керак, деб огоҳлантираман», деди у. 

Лукашенко ҳарбийларга фуқароларга қарата ўқ узишга рухсат берди 

Феврал ойи бошида Лукашенко Беларус қуролли кучлари ички хизмати низомига ўзгартириш киритиб, ҳарбийларга фуқароларга қарши қурол ишлатиш ҳуқуқини бергани маълум бўлди. Бошқа нарсалар қаторида у низомнинг 11-моддасини ўзгартиришни буюрди. Фуқаро жароҳат олган ёки вафот этган тақдирда, прокурор, шунингдек дастлабки тергов органи дарҳол хабардор қилинади, аммо ҳарбий хизматчи, агар қурол «умумий ҳарбий талабларга мувофиқ» ишлатилган бўлса, етказилган зарар учун жавобгар бўлмайди», дейилади ҳужжатда. 

«Беларускі Гаюн» таъкидлаганидек, илгари низомда «ҳарбий хизматчиларнинг жисмоний куч, махсус воситалар, қуроллар, ҳарбий ва махсус техникани ўз ваколати доирасидан ташқари қўллаши қонун ҳужжатларида белгиланган жавобгарликка сабаб бўлади» деб ёзилган. 

2020 йил август ойида бўлиб ўтган президентлик сайловларидан сўнг Беларус хавфсизлик кучлари мамлакатда бошланган норозилик намойишларини қаттиқ бостирди. Энг кенг резонансга хавфсизлик кучлари томонидан калтакланганидан кейин вафот этган Роман Бондаренконинг ўлдирилиши ҳамда Минск ва Брестдаги тинч намойишлар чоғида отиб ўлдирилган Александр Тарайковский ва Геннадий Шутовнинг ўлими сабаб бўлди. Шутовнинг ўлими бўйича жиноий иш қўзғатилмади, кейинчалик марҳумнинг ўзи ва унинг дўсти Александр Кордюков айбланувчига айланди - улар ҳуқуқни муҳофаза қилиш органлари вакилларини ўлдиришга уринишда айбланган. Шутов жазо ўташ ҳақидаги қарорсиз айбдор деб топилди, дўстининг отиб ўлдирилганига гувоҳ бўлган Кордюков эса 10 йилга қаттиқ тартибли колонияга ҳукм қилинди.