Бербок Болқон мамлакатларида Россия таъсири тўғрисида огоҳлантирди

Германия ташқи ишлар вазири Анналена Бербок Черногория ҳамда Босния ва Ҳерцеговинага икки кунлик ташрифи олдидан Ғарбий Болқонда Россия таъсири хавфидан огоҳлантирди. «Биз Европанинг ҳеч қайси жойида кулранг ҳудудларга эга бўла олмаймиз ҳамда Россия ўз беқарорлаштириш, дезинформация ва аралашиш сиёсати учун фойдаланиши мумкин бўлган қанотларни ёпиш учун биргаликда ҳаракат қилишимиз керак», — дея AFP 4 март, душанба куни Бербокдан иқтибос келтирган.

Керакли ёрдам, деди Бербок, «демократик институтлар ва уларнинг барқарорлигини мустаҳкамлаш» ҳамда «одамларга иқтисодий истиқболларни тақдим этиш» бўлиши керак. Россиянинг «шафқатсиз империализми» олдида геосиёсий императив - Ғарбий Болқон олтита давлатини Европа Иттифоқига олиб борадиган йўлда «бутун кучимиз билан қўллаб-қувватлашдир». 

Ташриф режаси

Германия ТИВ маълумотларига кўра, идора раҳбари мамлакат пойтахти Подгорицада Черногория бош вазири, ташқи ишлар вазири ва президенти билан музокаралар ўтказади. Учрашувлар, биринчи навбатда, Черногориянинг ЕИга кириш жараёни ва зарур ислоҳотларни амалга оширишдаги тараққиётга бағишланади. Бу жараёнда Черногория ўз олдига «амбицияли вазифа қўйди ва ҳозир уни дадил амалга оширмоқда», деб таъкидлади Бербок. 

Босния ва Ҳерцеговина пойтахтида Германия ташқи ишлар вазирлиги раҳбари мамлакат президенти ва ташқи ишлар вазири билан учрашади. Бербокнинг таъкидлашича, Сараево Европа Иттифоқи билан муносабатларида «чорраҳада» турибди ва унга кириш бўйича музокараларни бошлаш учун зарур ислоҳотларни амалга ошириши керак. «2024 йил октябр ойида бўлиб ўтадиган муниципал сайловлар олдидан сайлов қонунчилигини яхлитлик пактига (Integritätspakt) мувофиқ ўтказиш ниҳоятда муҳим», деди Анналена Бербок. 

Олти Болқон давлатининг барчаси Европа Иттифоқига қўшилишга интилмоқда, аммо жараён турли босқичларда. Баъзи давлатлар Европа Иттифоқига аъзо бўлишни ўн йилдан ортиқ кутмоқда. Фақат мустақиллиги ҳалигача Европа Иттифоқига аъзо бир қанча давлатлар томонидан тан олинмаган Косово Республикаси ЕИга номзод мақомига эга эмас.