Қирғизистон ўз фуқароларига Россияга бормай туришни тавсия қилди

Қирғизистон ТИВ мамлакат фуқароларини, хусусан Россияда аввал бир неча марта маъмурий ҳуқуқбузарлик содир этган қирғизистонликларни РФдаги қўшимча хавфсизлик чоралари ва чегарадан ўтказишнинг кучайтирилган режими бекор қилинмагунча бу мамлакатга бормай туришга чақирди. Россиядаги қирғизистонликлардан одам кўп тўпланадиган жойларга бормаслик сўралмоқда.

Фото: 24.kg

Қирғизистон Ташқи ишлар вазирлиги Москва яқинидаги “Крокус сити ҳолл” мажмуасида рўй берган терактдан кейин бутун Россия бўйлаб хавфсизлик чоралари кучайтирилгани муносабати билан қирғизистонликларга мурожаат билан чиқди.

“Россия Федерациясига кириш учун фавқулодда муҳим сабаблари бўлмаган фуқароларга қўшимча хавфсизлик чоралари ва давлат чегарасидан ўтказишнинг кучайтирилган режими бекор қилингунга қадар ушбу мамлакатга боришдан тийилиш тавсия этилади”, – дейилади вазирлик мурожаатида.

Шунингдек, Россияга аввалги сафари вақтида икки ёки ундан кўпроқ марта маъмурий жавобгарликка тортилган қирғизистонликлар ҳам РФ чегарасидан ўтказилмаслиги эҳтимоли сабаб Россияга бормай туриши тавсия қилинган.

Россияга боришни режа қилиб қўйган фуқаролар РФ Ички ишлар вазирлиги сайти орқали мамлакатга киришига чеклов қўйилмаганини аввалдан текшириб олиши мақсадга мувофиқлиги таъкидланган.

Шунингдек, Россияда бўлиб турган Қирғизистон фуқароларидан одамлар кўп тўпланадиган жойларга бормаслик, ўзи билан доимий равишда шахсини тасдиқловчи ва мамлакатда қонуний асосда бўлиб турганини ҳужжатларни олиб юриш сўралмоқда.

Қирғизистон, шунингдек, Россиядаги ўз фуқароларини РФ ҳуқуқ-тартибот идоралари ходимларининг қонуний талабларига бўйсунишга ҳам чақирган.

#Қирғизистон #Крокус Сити Ҳолл

Россиянинг Москва вилояти, Красногорск шаҳридаги «Крокус Сити Холл» концерт залида отишма юз берди. Маҳаллий ОАВ хабарларига кўра, номаълум шахслар автомат милтиқдан одамларга қарата ўқ узган.