Учувчиларнинг машғулот базасидаги Путин ва Украина шарқидаги танкчилар. Уруш суратлари

Украинадаги урушнинг 764-куни ўтди. Асосий маълумотлар:

Севастопол атрофида Россиянинг Су-35 қирувчиси қулади.
Reuters агентлиги ёзишича, нефтни қайта ишлаш заводларига дронлар ҳужуми фонида Россия Беларусдан бензин харид қилиш ҳажмини оширган.
РФ қўшини Украинага дронлар ва ракеталар билан ҳужум қилди. Запорижжяда икки киши яраланган.
«Комсомолск» гуруҳи концерт фаолиятини тўхтатди. Мусиқачилар «тақиқланган артистлар» рўйхатида бўлган ва аннексия қилинган Мелитополда чиқиш қилганди.
Тергов қўмитаси «Крокус»даги террорчиларнинг «украин миллатчилари» билан алоқаси аниқланганини маълум қилди.
«Россиялик мулозимлар яхшигина гўнг сотувчиларга ўхшаяпти». Оқ уй Москванинг Украина «Крокус» терактига алоқадорлиги ҳақидаги баёнотларини «пропаганда» деб атади.
The New York Times АҚШ ўз манбаларини ошкор қилишдан хавотирланиб, теракт тайёрланаётгани ҳақида ўзида мавжуд бўлган барча разведка маълумотларини Россияга тақдим этмагани ҳақида хабар берди.

Углегорскдаги вайронгарчилик

Донецк областининг Углегорск шаҳри қарийб 10 йилдирки ўзини ўзи эълон қилган ДХР таркибида. РФ қўшинларининг Украинага кенг кўламли босқини бошлангач, урушга қадар етти минг киши яшаган Углегорск мунтазам равишда зарбаларга учраб келмоқда. ДХР расмийлари украин қўшини шаҳар бўйлаб ўт очиши ҳақида хабар беради, Россия Тергов қўмитаси отишмалар юзасидан жиноий ишлар очади, Украина томони эса одатда Углегорск ва Россия Донецк областида босиб олган бошқа шаҳарлар бўйлаб зарбаларни изоҳсиз қолдиради.

Alexander Ermochenko / Reuters / Scanpix / LETA

Владимир Путин РФ мудофаа вазирлиги учувчиларининг машғулот базасида

РФ президенти Владимир Путин мудофаа вазирлигининг Твер областидаги жанговар фойдаланиш ва учувчиларни қайта тайёрлаш марказига ташриф буюрди. Унга Ми-28 ва Ми-8 вертолётлари намойиш этилган, шунингдек у Ми-26 пилотлари тренажёрида шуғулланган.