Мэр: Харкивда деярли бутун энергетика инфратузилмаси вайрон бўлди

Харкивда Россиянинг ўққа тутиши натижасида деярли бутун энергетика инфратузилмаси вайрон бўлди. Бу ҳақда шаҳар мэри Игор Терехов Украинанинг Liga.net нашрига 1 апрел, душанба куни чоп этилган интервюсида айтди. 

«Душманнинг режаси нима эканини билмайман. Деярли барча муҳим энергетика инфратузилмаси вайрон қилинди, хусусий инфратузилма ҳам бир аҳволда. Россия бизни қўрқитмоқчи, аммо бунинг иложи йўқ. Икки йил давомида биз турли даражадаги таҳдидларни кўрдик, ҳатто Харкивнинг ўзида ДРГ (диверсион-разведка гуруҳи)гача. Деярли икки миллионлик шаҳардан бор-йўғи 300 минг (аҳоли) қолган пайтлар ҳам бўлган. Аммо, ҳеч ким дарвозаларни очиб бермаяпти. Биз қийинроқ вақтларни бошдан кечирдик - бундан ҳам омон қоламиз», - деди Терехов. 

Мэрнинг сўзларига кўра, Россия Харкивга қарши узоқроқ - 90 кмгача бўлган ҳаракатга эга янги снарядларни Белгород ва минтақадан учирмоқда. Бундай ҳолда, кўпинча С-300 комплекслари қўлланади, уларнинг снарядлари Харковга 40 сонияда етиб боради. 

Россия Харкивга ҳужум қилишга тайёрланяптими? 

22 март куни Россиянинг оммавий зарбаси натижасида Харкивдаги иссиқлик электр станцияси ва барча нимстанциялар вайрон бўлди, уйларнинг 60 фоизи электр энергиясиз қолди, шаҳарда электр транспорти ҳаракати тўхтади. Ўшандан бери шаҳар яна бир неча ҳужумга учради ва энергетикларнинг инфратузилмани тиклашга уринишига қарамай, электр таъминотидаги узилишлар давом этмоқда. Шаҳар мэри шаҳарга етказилган зарарни 10 миллион доллардан ортиқ деб баҳоламоқда. 

Оммавий ахборот воситаларида Россия Харкивга ҳужумга ва баҳорда яна 300 минг кишини ҳарбий хизматга чақиришга тайёрланаётгани ҳақида маълумотлар пайдо бўлди. Игор Терехов Liga.net нашрига берган интервюсида, бу «душманнинг, яъни Россиянинг махсус ахборот операцияси», деган фикрни билдирди. УҚК бош қўмондони Александр Сирский Россия ҚКни Харкивни эгаллаб олишга янги уринишдан огоҳлантириб, бу шаҳар россияликлар учун «ҳалокатли» бўлишини ваъда қилди.