Терактда жабрланганлар Россия Тергов қўмитасига «Крокус» эгалари устидан шикоят қиляпти

«Крокус Сити Холл»даги терактда жабрланган 11 киши Россия Тергов қўмитасига қўшма ариза бериб, «Крокус» эгаларига хавфсиз бўлмаган хизматлар кўрсатгани учун жиноий иш қўзғатишни талаб қилди. Бу ҳақда 2 апрел, сешанба куни даъвогарларнинг адвокати Игор Труновга таяниб, РИА «Новости» хабар берди.

Труновнинг сўзларига кўра, дастлаб у теракт содир бўлган куни «Пикник» гуруҳи концертини суратга олиши керак бўлган Иван Помориннинг суратга олиш гуруҳи манфаатларини ҳимоя қилган, кейинроқ уларга қурбонларнинг қариндошлари ва жабрланганлар ташаббускор гуруҳи қўшилган.

Баёнотда «Крокус» 1998-1999 йилларда лойиҳалаштирилгани ва 2009 йилда фойдаланишга топширилгани, шундан бери хавфсизлик талаблари сезиларли даражада ўзгаргани айтилади. Адвокатнинг сўзларига кўра, нормалар энди «янги лазер датчик тизимлари, автоматика, ёнғин ўчириш тизимлари, ёнғинга чидамли қопламалар учун доимий равишда катта миқдорда маблағ сарфлашни» талаб қилади. 

Даъвогарлар хавфсизлик нормаларига риоя қилинмаганини билдиряпти

Даъвогарларнинг таъкидлашича, «Крокус»да ёнғин бошланганидан кейин бир неча сония ичида саҳна пардаси олов билан қопланган, бу, ҳимоя томони фикрига кўра, ёнғин хавфсизлиги стандартлари бузилганини кўрсатиши мумкин, чунки парда ёнғинга чидамли махсус мато билан қопланган бўлиши керак.

Бундан ташқари, ҳужжатда айтилишича, «Крокус»нинг «ёнғинга қарши сув тизими» ва тутунни олиб ташлаш тизими «носоз бўлган», аксарият эвакуация эшиклари теракт ва эвакуация вақтида ёпиқ турган. 

Crocus Group эгасининг ўғли Эмин Агаларовнинг РИА «Новости»га айтишича, «Крокус»даги барча хавфсизлик тизимлари ишлаган, барча ўт ўчириш гидрантларида босим бўлган. Кейинчалик, РБК эфирида у «Крокус»да ёнғиндан ҳимоя қилиш тизими «максимал даражада ишлаганини», «ёнғиндан умуман зарар кўрмаган хоналар мавжудлигини», ёнғин хавфсизлиги стандартларига риоя қилмасдан туриб, бино фойдаланишга топширилмаслигини таъкидлади.

«Крокус Сити Холл»га ҳужум

Москва яқинидаги Красногорскда «Крокус Сити Холл» биносига ҳужум 22 март куни кечқурун содир бўлди. Қуролланган одамлар бинога бостириб кириб, автоматлардан ўт очган, бир неча портлашлар эшитилган ва ёнғин бошланган. Сўнгги маълумотларга кўра, теракт оқибатида 144 киши ҳалок бўлган, яна 551 киши жароҳатланган.

«Крокус Сити Холл»даги терактдан сўнг «ФСБ» ушбу ишда гумон қилинган 11 киши қўлга олинганини эълон қилди. Судлар аллақачон ўн кишини, шу жумладан тўрт нафар бевосита ижрочини ҳибсга олган. Улар суд мажлисларига қийноқлар белгилари билан олиб келинган - улардан бири тиббий аравачада келтирилган.

Ҳужум учун жавобгарликни ИШИД террор ташкилоти ўз зиммасига олди. Шу билан бирга, Россия раҳбарияти терактга Украинанинг алоқадорлиги тахмин қилинмоқда. Киев, шунингдек, ғарб давлатлари, жумладан АҚШ ва Германия бу айбловларни рад этади.