Ҳайит байрами кунларида ҳарорат кўтарилиши кутилмоқда

Ўзбекистонда душанба куни кундузи республика ҳудудининг катта қисмида қуруқ ва жуда илиқ об-ҳаво сақланиб туради, ҳарорат +22…+27, жанубда 30 даражагача илиқ бўлади дея хабар бермоқда «Ўзгидромет».

Қорақалпоғистон Республикаси, Хоразм вилоятида ва Навоий вилояти шимолида баъзи жойларда бироз ёмғир ёғиши мумкин.

9 апрел куни Тошкент, Самарқанд, Жиззах, Сирдарё вилоятларида ва Фарғона водийси вилоятларида баъзи жойларда ёмғир ёғади ва ҳаво ҳарорати +15…+20 даражагача пасаяди. Бухоро, Навоий вилоятларида фақат кечаси ва эрталаб бироз ёмғир ёғиши мумкин. Қорақалпоғистон Республикаси, Хоразм, Қашқадарё, Сурхондарё вилоятларида ёғингарчилик кутилмайди. Ҳаво ҳарорати +15…+20 даражагача пасаяди.

10–11 апрел кунлари Ўзбекистоннинг барча ҳудудлари бўйича ёғингарчилик кутилмайди. Ҳаво ҳарорати яна +22…+27 даражагача, жанубда +30 даражагача кўтарилади.

12–14 апрел кунлари беқарор об-ҳаво бўлиши кутилмоқда. Баъзи жойларда ёмғир ёғади, айрим жойларда момақалдироқ бўлади. Ҳарорат асосан кечалари +7…+12 даража, кундуз кунлари +18…+23 даража бўлади. Республика шимолида ёмғир ёғиши эҳтимоли кам.

Тоғли ҳудудларда 9 апрел ва 12–14 апрел кунлари вақти-вақти билан ёғингарчилик (ёмғир, баланд тоғларда қор) бўлади. Қор кўчиши хавфи сақланиб туради. Республиканинг айрим жойларида шамол тезлиги 15–20 метр/сониягача кучайиши мумкин.

Тошкент шаҳрида эса душанба кундузи ҳаво асосан бироз булутли бўлади, ёғингарчилик кутилмайди. Ҳарорат +24…+26 даража бўлади. 9 апрелда эрталаб ва куннинг биринчи ярмида вақти-вақти билан ёмғир ёғади. Ҳарорат +16…+18 даража бўлади.

10–11 апрел кунлари ёғингарчилик кутилмайди. Ҳарорат +22…+24 даража бўлади. 12 апрелда куннинг иккинчи ярмида ва 13–14 апрел кунлари вақти-вақти билан ёмғир ёғади. Ҳарорат +18…+23 даража бўлади. Ҳарорат асосан кечалари +7…+12 даража бўлиши кутилмоқда.