Украина урушдан олдинги экспорт даражасига чиқди

Апрел ойида Украина рекорд ҳажмдаги маҳсулотларни экспорт қилди: экспорт 13 миллион тоннадан ортиқни ташкил этиб, 2022 йил феврал ойидаги кўрсаткичлардан ошиб кетди. Бу ҳақда Украина бош вазирининг биринчи ўринбосари ва иқтисодиёт вазири Юлия Свириденко 1 май, чоршанба куни мамлакат ижроия ҳокимияти веб-порталида маълум қилди ва апрел ойида экспорт ҳажми 3,3 миллиард долларга (3 миллиард евродан ортиқ) етганини билдирди.

Ҳужжатда қайд этилишича, Украина урушдан олдинги экспорт даражасига етган. «Бу март ойига нисбатан 1,3 миллион тоннага кўп», деди Свириденко. Вазирнинг аниқлик киритишича, Россия агрессиясига қарамай, мамлакат «экспорт ҳажмини, биринчи навбатда, хомашёни кўпайтириш бўйича ишларни давом эттирмоқда». Иқтисодиёт вазирлиги раҳбарининг сўзларига кўра, экспорт кўрсаткичлари ўсишига 2023 йил ёзида Украинага, хусусан, дон ва металл экспорт қилиш имконини берувчи муқобил денгиз йўлаги очилиши ҳам таъсир кўрсатди. 

Украина ва Британия ўртасидаги қўшма дастур

Ҳужжатда қайд этилишича, 1 март куни Лондонда Юлия Свириденко бошчилигидаги Украина делегациясининг Британияга ташрифи доирасида Marsh McLennan суғурта компанияси ва Lloyd's of London компанияси томонидан амалга оширилаётган UNITY арзон кема суғуртаси дастурини кенгайтириш бўйича Лондон суғурта платформаси ҳақида эълон қилинди. 

Дастур нафақат дон ва бошқа муҳим озиқ-овқат маҳсулотларини денгиз орқали ташишни, балки барча ноҳарбий юкларни, шу жумладан металл ташувчи кемаларни ҳам суғурта қилиши мумкин. Бундан ташқари, контейнер ташиш учун суғурта мавжуд, дейилади матнда. 

Украинадан уруш шароитида экспорт қилиш 

Украина ОАВнинг таъкидлашича, мамлакат экспортига биринчи навбатда Молдова ва Руминия билан «бирдамлик линиялари» салоҳиятининг кенгайиши, шунингдек, юкларни темирйўл орқали Дунай портларига ташиш учун яхшиланган шартлар ижобий таъсир кўрсатди. 

Украинанинг БМТдаги доимий вакили Сергей Кислица яқинда хабар қилганидек, Россия Қора денгиздаги «дон келишуви»дан чиққанидан кейин Украина шериклари билан яратган вақтинчалик денгиз йўлидан 1300 та кема фойдаланган. Ҳатто шундай оғир шароитларда ҳам Украина қишлоқ хўжалиги маҳсулотлари 40 мамлакатга етказиб бериляпти. 2024 йил февралида Украина вақтинчалик денгиз йўлаги орқали ўша пайтдаги рекорд даража - 8 миллион тонна юкни экспорт қилди, дея аниқлик киритмоқда ОАВ ўз манбаларига таяниб. 

Reuters: Украина Қора денгиз хавфсизлиги бўйича келишувни бузди 

Украина кутилмаганда Россия ва Туркия билан Қора денгизда хавфсиз ҳаракатланиш бўйича келишувдан чиқди, деб хабар берди Reuters 16 апрел куни. «Охирги дақиқада Украина тўсатдан чиқиб кетди ва келишув бекор қилинди», деди агентликка унинг манбаси, бу маълумот яна учта суҳбатдош томонидан тасдиқланган.

Келишувга деярли эришилганда Киев ўйиндан чиқди, дея тасдиқлади ОАВ манбалари. Сабаблари изоҳланмаган. Қайд этилишича, Украина ва Россия Федерацияси бу музокараларни икки ой давомида Туркия воситачилигида олиб борган. Рад этиш сабаблари номаълум. Россия, Украина ва Туркия бу борада изоҳ беришдан бош тортди.