«Аянчли хато бўлди» – Нетаняҳу Рафаҳдаги ноҳарбий объектга зарба берилганини тан олди

Исроил бош вазири Бинямин Нетаняҳу ЦАХАЛ Ғазодаги Рафаҳ шаҳрида ноҳарбий бинога зарба берганини тан олди. Бу зарба оқибатида қочоқлар лагерида ёнғин чиққан ва камида 45 киши ҳалок бўлганди.

Фото: Yonatan Sindel / Flash90

Душанба куни Исроил парламентида чиқиш қилган Нетаняҳу Рафаҳга ракета зарбаси берилаётганда «аянчли хатога йўл қўйилгани»ни тан олди. У айнан қандай хато экани ҳақида гапирмади, лекин ҳолат текширилаётганини айтди.

«Тинч аҳоли вакилларига зарар етказмаслик бўйича қилаётган ишларимизга қарамай, кеча тунда аянчли хато содир бўлди. Ҳолатни текширамиз ва хулоса қиламиз. Бизнинг сиёсатимиз шунақа», деди Нетаняҳу.

27 майга ўтар кечаси берилган ракета зарбаси оқибатида қочоқлар яшаётган чодирлар ёнаётгани тасвирланган кадрлар ўша вақтдаёқ тарқалганди. Кейинроқ ЦАХАЛ зарба аниқ разведка маълумотига асосланиб берилгани, бу ҲАМАС объекти экани ҳақида баёнот берди.

Исроил Рафаҳга ҳужум қилди. 45 киши ўлгани айтилмоқда

Исроил ҳарбийлари берган баёнотда зарба тинч аҳолига зарар етказмагани, аксинча ҲАМАСнинг икки нафар юқори мартабали ҳарбийсини ўлдиргани айтилганди. Аммо тинч аҳоли вакиллари ўлганини исботловчи кадрлар тарқалиб, халқаро ҳамжамият зарбани қоралай бошлагач, исроиллик ҳарбийлар ҳам текширув бошлаганини айтиб чиқишди.

Сешанба куни Исроилнинг Рафаҳга ажалвор зарбасидан кейин БМТ хавфсизлик кенгаши фавқулодда йиғилиш ўтказди. Ёпиқ эшиклар ортидаги учрашувни хавфсизлик кенгашининг вақтинча аъзоси Жазоир чақиртирган.

#Бинямин Нетаняҳу #Рафаҳ

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.