Re:Russia лойиҳаси: йил давомида ЯИМ 1,5 фоизи ҳарбийларга тўлов учун сарфланган

Украина билан урушда қатнашган ҳарбий хизматчиларга, шунингдек, ўтган 12 ой давомида – 2023 йил июлидан 2024 йил июнигача бўлган жанговар ҳаракатлар пайтида ярадорлар ва ҳалок бўлганларнинг қариндошларига тўловлар тахминан 2,75-3 триллион рублни ташкил қилди. Бундай ҳисоб-китоблар 16 июл, сешанба куни Re:Russia лойиҳаси томонидан эълон қилинди ва бу миқдор Россиянинг 2024 йилда кутилаётган ЯИМнинг 1,5 фоизига тўғри келишини кўрсатилмоқда.

«Жами, миллионга яқин Россия фуқаролари урушда қатнашган», - дейди нашр. Украинадаги рус гуруҳи, ҳарбий маошлар миқдори, шартнома хизмати учун тўловлар ва жароҳатлар учун тўловлар тўғрисидаги маълумотларга асосланиб, журналистлар қуйидаги хулосага келди: «Фақат ўтган йил учун жангчиларнинг маошлари, жароҳатлар ва ўлимлар учун тўловлар миқдори гуруҳнинг тахминий ҳажмига қараб 2,75 триллион рублдан 3 триллион рублгача бўлиши мумкин, бу 2024 йилда Россиянинг кутилаётган ЯИМ 1,4-1,6 фоизини ташкил қилади (191 триллион) ва жорий йил учун барча федерал бюджет харажатларининг (жами 36,7 трлн рубл) 7,5-8,2 фоизига тенг». 

Шу билан бирга, ҳарбий хизматчиларга ойлик тўловлар (шартнома тузиш учун бир марталик тўловларни ўз ичига олган ҳолда), Re:Russia ҳисоб-китобларига кўра, 1,55 - 1,8 триллион рублни, жароҳатлар ва ўлимлар учун тўловлар эса тахминан 1,2 триллион рублни ташкил этди.

Уруш меҳнат бозорининг бир қисми сифатида 

Лойиҳа кузатувига кўра, «сўнгги бир ярим-икки йил ичида уруш Россия меҳнат бозори ва фуқароларнинг умумий даромади муҳим қисмига айланди». Турли манбалардан олинган Россиянинг Украинадаги йўқотишлари ҳақидаги маълумотларни таҳлил қилиб, журналистлар Россия фронтда «ишчи кучининг тахминан 1,3 фоизини» йўқотган деган хулосага келди.