Россия ИИВ мамлакатни тарк этганлар маълумотлар базасини яратишни таклиф қилди
Россия Ички ишлар вазирлигининг мамлакатни тарк этганлар ҳақида маълумотлар базасини яратиш таклифи Путинга киритилган экстремизмга қарши кураш бўйича янги стратегия лойиҳасида келтирилган, деб ёзади «Важные истории».
![](https://storage.kun.uz/source/10/IEg6vQ3qTHBL-4sDjJdwae1k0bQ2yMlj.jpg)
Фото: Shakh Aivazov/AP/picture alliance
Россия Ички ишлар вазирлиги мамлакатни тарк этган шахсларнинг маълумотлар базасини яратишни таклиф қилди. Бу таклиф мамлакат президенти Владимир Путинга киритилган экстремизмга қарши кураш бўйича янги стратегия лойиҳасида келтирилган. 22 июл, душанба куни «Важные истории» нашри ҳуқуқий ахборот порталида эълон қилинган ҳужжатга эътибор қаратди.
Хусусан, «экстремистик ташкилотларда қатнашиш, шунингдек, дўст бўлмаган давлатларнинг хорижий марказларида малака ошириш учун» Россиядан чиқиб кетганларнинг ҳисобини юритиш таклиф қилинмоқда. Шу билан бирга, маълумотлар базасига айнан кимлар киритилиши, шунингдек, ташаббус муаллифлари режалаштирганидек, унда қандай маълумотлар бўлиши кераклиги тушунтирилмаган.
Интернетда Россияни тарк этган фуқаролар маълумотлар базаси пайдо бўлди
«Агентство» июл ойи бошида хабар қилганидек, интернетда Украинада уруш бошланганидан кейин мамлакатни тарк этган россияликлар ҳақидаги маълумотлар базаси пайдо бўлди. «Россия Федерациясидан 2022-2024 йилларда чиқиб кетганлар» рўйхатидаги шахснинг картасида унинг исми, фамилияси ва отасининг исми, туғилган санаси, шунингдек, мамлакатни тарк этган сана, йўналиш ва «сабаб» кўрсатилган. Фақат учта «сабаб» бор: «Махсус ҳарбий операция бошланиши», «сафарбарлик ҳақидаги эълон» ва «Вагнер» ХҲК исёни».
Рўйхат авиакомпаниялар маълумотларидан фойдаланган ҳолда тузилган, шунингдек, Россия Федерациясидан пиёда, денгиз ва автомобил йўллари орқали чиқиб кетганлар ҳақидаги маълумотлар ҳам ҳисобга олинди, дейилади журналистлар сўровига жавобан. «Агентство» 2022-2023 йилларда Россиядан чиқиб кетган 10 нафар шахсни текшириб, улардан иккисини маълумотлар базасидан топа олмади. Журналистлар яна иккита картада хатоликларни аниқладилар.
The Bell: Уруш пайтида 600 мингдан ортиқ киши РФни тарк этган ва қайтиб келмаган
2022 йил феврал ойида Украинага қарши кенг кўламли уруш бошланганидан кейин камида 666 минг киши Россияни тарк этиб, қайтиб келмаган. Бу ҳақда 16 июл куни The Bell ўз тадқиқоти натижалари бўйича хабар берди.
Жорий тадқиқот расмий эълон қилинган маълумотлар, расмийлар ва дипломатларнинг баёнотлари, шунингдек, қабул қилувчи ҳар бир давлатнинг статистик маълумотлари таҳлилига асосланган. Уларни олиш учун журналистлар қарийб 70 мамлакатнинг миграция ва статистика органларига сўров юборишган.
Муаллифларнинг таъкидлашича, бу рақам нотўғри бўлиши мумкин, чунки баъзи давлатлар (Таиланд, Индонезия) сўровларга жавоб бермаган, бошқалари (Кипр) уларга кўчиб ўтган ёки 2023 йил учун иммиграция маълумотларини ҳали эълон қилмаган русларнинг ҳисобини юритмайди (Португалия) . Бундан ташқари, чет элда яшаш ёки ишлаш ёки ўқиш учун рухсатнома олган қанча россиялик охир-оқибат Россия Федерациясига қайтишга қарор қилганлигини билиш мумкин эмас.
Мавзуга оид
![](https://storage.kun.uz/source/thumbnails/_medium/10/43Aowl-v7LNt-Km5lppSu_uZIevq5slk_medium.jpg)
15:30
Москва Россия бозорини тарк этган хорижликлар учун тўловни оширмоқчи
![](https://storage.kun.uz/source/thumbnails/_medium/10/msolv-J6BPk8YHesdT-vaH_5k4rgJbGx_medium.jpg)
14:30
The Guardian: Россия армияси Украинанинг Курск областидаги режалари ҳақида олдиндан билган
![](https://storage.kun.uz/source/thumbnails/_medium/10/biyZllNAY3OqBmo9StLR01S5eOjQFW-x_medium.jpg)
14:10
Россияда «чет эл агентлари»ни кадрлар захирасига киритиш тақиқланди
![](https://storage.kun.uz/source/thumbnails/_medium/10/S1CB6ub6fzzCvNocphzIMPZEL7AVZrWy_medium.jpg)
12:30