Республикачилар Украинанинг Россияга зарба беришига қўйилган чекловларни бекор қилишга чақирди

АҚШ Конгресси Вакиллар палатасидаги бир гуруҳ республикачилар президент Жо Байденга мактуб йўллаб, Украинанинг Россияга қарши урушда АҚШ томонидан унга берилган узоқ масофали ракеталардан, биринчи навбатда, ATACMS'дан фойдаланишига қўйилган чекловларни бекор қилишга чақирди. Ушбу ҳужжатнинг тўлиқ матни 10 сентябр куни АҚШ Конгресси Вакиллар палатасининг Қуролли кучлар бўйича қўмитаси сайтида эълон қилинди.

Вакиллар палатасининг қуролли кучлар қўмитаси раиси Майк Рожерс, Вакиллар палатасининг ташқи ишлар қўмитаси раиси Майкл Маккол, Вакиллар палатасининг разведка бўйича доимий қўмитаси раиси Майк Тернер, Вакиллар палатасининг Европа бўйича қуйи қўмитаси ташқи ишлар қўмитаси раиси Том Кин, мудофаа учун ажратмалар қўмитаси раиси Кен Калверт, ЕХҲТ Парламент ассамблеяси раиси ўринбосари, Ҳелсинки комиссияси аъзоси Ричард Ҳадсон имзо чекканлар орасида бор.

«Россиядаги қонуний ҳарбий нишонларга зарбалар»

Улар Жо Байден ва Камала Ҳаррис маъмуриятини «Россия ҳудудида чуқурроқ жойлашган қонуний ҳарбий нишонларга зарба бериш учун» АҚШнинг узоқ масофали ракеталаридан фойдаланишга қўйилган чекловларни бекор қилишга чақирмоқда.

«Байден-Ҳаррис маъмуриятининг маъносиз чекловлари, муҳим қуролларни тасдиқлаш ва етказиб беришдаги кечикишлар Украинани бу урушни ғалабали якунлашига тўсқинлик қилмоқда», дейилади мактубда. «Маъмурият учун бу йўлни ортга қайтариш вақти аллақачон ўтган ва Украинанинг Россиядаги қонуний ҳарбий нишонларига қарши АҚШ томонидан тақдим этилган қуроллардан фойдаланиш бўйича қолган чекловларни бекор қилиш лозим».

Мурожаат муаллифларига кўра, жорий чекловлар «Украинанинг Россия тажовузкор урушида ғалаба қозониш қобилиятига тўсқинлик қилмоқда ва Кремл кучларини Украинага жазосиз ҳужум қилиш имконияти билан таъминламоқда».

«Агар хабар қилинганидек, Россия планер бомбалари билан қуролланган кўплаб самолётларини Америка қуроллари етиб борадиган масофадан олиб чиқиб кетган бўлса ҳам, Россия ҳудудида бу зонада бошқа кўплаб қонуний ҳарбий нишонлар сақланиб қолмоқда», - дея фикр билдирган конгрессменлар.

Бироқ улар кучайиши мумкин бўлган кескинлашувга қарши эканликларини таъкидламоқдалар: «Урушнинг биринчи кунидан бошлаб маъмурият хавотири бор эди. На Украинанинг Россия ҳудудида АҚШ томонидан тақдим этилган қуроллардан фойдаланиши, на унинг Курскка ҳарбий бостириб кириши Россиянинг кескин жавобини келтириб чиқармади».