Ветнамдаги ҳайвонот боғида ўнлаб йўлбарслар парранда гриппи туфайли нобуд бўлди

Ветнам жанубидаги ҳайвонот боғларида парранда гриппи тарқалганидан кейин ўнлаб йўлбарслар нобуд бўлди, деб хабар беради BBC.

Маълум қилинишича, август ойида вирус оқибатида учта шер ва пантера, шунингдек, 47 та йўлбарс ҳалок бўлган. H5N1 вируси Хошимин шаҳри яқинидаги Вуон Хоай ҳайвонот боғида ва Лонган провинциясидаги Май Куин боғида қайд этилган.

Reuters агентлигининг ёзишича, йиртқичлар касалланган товуқларнинг гўшти билан озиқлантирилганидан кейин нобул бўлган.

Ветнам Соғлиқни сақлаш вазирлигига кўра, нобуд бўлган йўлбарслардан олинган намуналар уларда парранда гриппи мавжудлигини тасдиқлаган ва ҳукумат «ушбу парранда гўштлари манбасини аниқлашга киришган».

Жаҳон соғлиқни сақлаш ташкилоти (ЖССТ) веб-сайтидаги маслаҳатларда юқиш хавфи юқори бўлгани сабабли парранда гриппи авж олган ҳудудлардан хом ёки яхши пишмаган гўшт ҳамда тухумни истеъмол қилмаслик тавсия этилади.

H5N1 вируси штамми биринчи навбатда ҳайвонларга юқади. 2003 йилдан бери 900 га яқин инсонга парранда гриппи билан касалланиш ташхиси қўйилган бўлса, уларнинг ярмидан ортиғи вафот этган.