Сергелидаги портлаш: 4 нафар айбланувчининг ҳар бири 5 йилга озодликдан маҳрум қилинди

2023 йил 28-сентябрь куни соат 2:43 Тошкент шаҳри Сергели тумани Қурувчилар массивида “Inter logistics” компанияси омборхонада кучли портлаш рўй берган эди. Расмий маълумотларга кўра, ҳудуддаги 39 та кўп қаватли уйнинг 1370 та хонадони ҳамда 246 та ҳовлиларга зиён етиб, умумий зарар миқдори 14,5 млрд сўмни ташкил этганди. Фожиа оқибатида 1 нафар ўсмир вафот этган, 100 дан ортиқ фуқаролар жабрланган эди.

Daryo.uz нашрининг хабар беришича, 11 октябрь куни Жиноят ишлари бўйича Миробод туман судида судья Дадабоева раислигида мазкур иш кўриб чиқилди. 4 нафар судланувчининг ҳар бири Жиноят кодексининг 259-моддаси 2-қисми “а” ҳамда “б” бандлари назарда тутилган жиноятлар — “одам ўлиши ва бошқа оғир оқибатлар келиб чиқишига сабаб бўлган ҳолда ёнғин хавфсизлиги қоидаларининг шу қоидалар бажарилиши учун масъул бўлган шахс томонидан бузилиши”да айбдор деб топилган. Судланувчиларга, ушбу модда учун назарда тутилган энг оғир жазолар тайинланган, хусусан:

Inter Logistics МЧЖ директори Фирдавс Сайиддинов – Жиноят кодексининг 259 модда, 2 қисми “а” ва “б” бандлари билан айбдор, деб топилган. У шу модда билан 2 йил давомида “раҳбарлик ва ёнғин хавфсизлиги вазифалари юклатилган лавозимларда ишлаш ҳуқуқи”дан маҳрум этилиб, 5 йил муддатга озодликдан маҳрум қилиш жазоси тайинланди. Тайинланган жазони манзил колонияда ўташ белгиланди.

Inter Logistics МЧЖ қўриқлаш хизмати бошлиғи Фарҳод Абдураҳимов – Жиноят кодексининг 259 модда, 2 қисми “а” ва “б” бандлари билан айбдор, деб топилган. У шу модда билан 2 йил давомида “раҳбарлик ва ёнғин хавфсизлиги вазифалари юклатилган лавозимларда ишлаш ҳуқуқи”дан маҳрум этилиб, 5 йил муддатга озодликдан маҳрум қилиш жазоси тайинланди. Тайинланган жазони манзил колонияда ўташ белгиланди.

Polychem МЧЖ директори Сардор Баҳромов – Жиноят кодексининг 259 модда, 2 қисми “а” ва “б” бандлари билан айбдор, деб топилган. У шу модда билан 2 йил давомида “раҳбарлик ва ёнғин хавфсизлиги вазифалари юклатилган лавозимларда ишлаш ҳуқуқи”дан маҳрум этилиб, 5 йил муддатга озодликдан маҳрум қилиш жазоси тайинланди. Тайинланган жазони манзил колонияда ўташ белгиланди.

Polychem МЧЖ омбор мудири Камолиддин Назаров – Жиноят кодексининг 259 модда, 2 қисми “а” ва “б” бандлари билан айбдор, деб топилган. У шу модда билан 2 йил давомида “раҳбарлик ва ёнғин хавфсизлиги вазифалари юклатилган лавозимларда ишлаш ҳуқуқи”дан маҳрум этилиб, 5 йил муддатга озодликдан маҳрум қилиш жазоси тайинланди. Тайинланган жазони манзил колонияда ўташ белгиланди.

Барча айбланувчилар учун жазо муддатини ўташ – 2023 йил 29 сентябрь бошлаб ҳисобланган ҳамда қамоққа олиш эҳтиёт чораси аслича қолдирилган.

Суд томонидан судланувчилар ҳамда Inter Logistics МЧЖ, Polychem МЧЖдан ўнлаб фуқаровий жабрланувчилар ва даъвогарлар фойдасига 282 миллиард сўм маблағни солидар тартибда ундириши белгиланди.