Ливан Исроил ҳужумлари туфайли аҳоли кўчиши инқирозига дуч келмоқда

Тўхтовсиз ўққа тутилиш мамлакатга етказилаётган инсонпарварлик ёрдамига ҳам жиддий таъсир кўрсатмоқда.

Фото: Anadolu Agency

Ливанда давом этаётган Исроил ҳужумлари туфайли инсонпарварлик ёрдами ва тиббий хизматлар билан боғлиқ вазият кундан-кунга ёмонлашмоқда ва мамлакат кенг кўламли аҳоли кўчиши инқирозига дуч келмоқда.

Бу ҳақда Халқаро Қизил Хоч ва Қизил Ярим Ой Жамиятлари Федерацияси (IFRC) Ливандаги вакили Лотте Рупперт «Анадолу»га маълум қилди.

У ўтган ойдан бери Ливанга ҳужумлар сони ортганига эътибор қаратди. «Мамлакатдаги вазият ҳақиқатан ҳам ёмонлашди. 2 мингдан ортиқ одам ҳалок бўлди, 10 мингдан ортиқ одам яраланди. Улар орасида оддий фуқаролар, тиббиёт ходимлари ва болалар ҳам бор. Шу муносабат билан биз зўравонликнинг бу ортишидан жуда хавотирдамиз», — деди Рупперт.

Ливан ҳукумати маълумотларига кўра, Исроилнинг ўққа тутиши сабабли мамлакатда 1 миллиондан ортиқ одам кўчирилди, уларнинг учдан бир қисми болалар.

Кўпчилик ҳанузгача хавфсиз маҳалла қидирмоқда ёки қўшнилари ёки қариндошлари билан яшашга мажбур, деди IFRC вакили.

#Исроил #Ливан