Навоий вилояти – Ўзбекистоннинг шимолий-ғарбида, асосан Қизилқум чўлларида жойлашган.

У шимол ва шимолий шарқда Қозоғистон, ғарбда Қорақалпоғистон, жануб ва жанубий ғарбда Бухоро, жанубий-шарқда Самарқанд ва Жиззах вилоятлари билан чегарадош.

Навоий Ўзбекистондаги энг ёш вилоят ҳисобланади. У 1982 йил 20 апрелда Бухоро ва қисман Самарқанд вилоятидан олинган ҳудудда ташкил этилган. 1988 йилда вилоят тугатилган ва 1992 йилда қайта ташкил этилган.

Вилоят ҳудуди 111 километр квадрат бўлиб, аҳолиси 1 млн 65 минг киши (2023 йил 1 июл ҳолатига).

Вилоятда 8 та туман бор. Маъмурий маркази Навоий шаҳри. Навоий вилояти аҳолисининг 70 фоизидан ошиқроғини ўзбеклар ташкил этади. Шунингдек, вилоятда камроқ миқдорда руслар, қозоқлар, украинлар, татарлар, озарбойжонлар ва бошқа миллатлар ҳам яшайди.

Навоий вилоятида Ўзбекистондаги бир нечта йирик корхоналар, жумладан Навоий тоғ-кон металлургия корхонаси, «Қизилқумцемент», «Навоийазот» каби корхоналар шу вилоятда жойлашган.

Навоий вилоятида жойлашган Мурунтов олтин кони дунёдаги энг йирик конлардан бири ҳисобланади.