O‘zbekiston Davlat jahon tillari universiteti bosh binosi foydalanishga topshirildi (Foto)

13 yanvar kuni O‘zbekiston Davlat jahon tillari universitetining bosh binosi foydalanishga topshirildi. Bu haqda Kun.uz sayti o‘z manbasiga asoslanib xabar qilmoqda.

2013 yildan boshlangan bunyodkorlik ishlaridan so‘ng 7 qavatli ma'muriy, 2200 o‘rinli ikkita o‘quv binosi butunlay yangidan qurildi. Avval rektorat binosi bo‘lgan uch qavatli inshoot esa kapital rekonstruksiya qilinib, kutubxona, o‘quv zali va kompyuter markaziga aylantirildi.

Bundan tashqari, Tarjimonlik hamda Ingliz tili 3- fakulteti binolari ham kapital ta'mirdan chiqarildi. Barcha binolar zamonaviy o‘quv jihozlari, kompyuter, multimedia vositalari va boshqa zarur inventarlar bilan ta'minlandi.

Talaba va professor-o‘qituvchilarning sport bilan shug‘ullanishlari uchun esa zamonaviy shart-sharoitlarga ega sport zali foydalanishga topshirildi. Qo‘shimcha ravishda, ochiq havoda futbol, volleybol, katta tennis o‘ynash uchun maydonlar, yugurish yo‘lagi va tomoshabinlar uchun o‘rindiqlar ham bunyod etildi.

Suratlar muallifi: Rasuljon Muhammadjonov