Respublikachi Jyeb Bush AQSh prezidentligi uchun poygadan chiqdi

Floridaning sobiq gubernatori Jyeb Bush Janubiy Karolinadagi praymerizdan so‘ng o‘z prezidentlik kampaniyasini to‘xtatishini ma'lum qildi. Bu haqda CNN telekanali xabar beradi.

Boshlang‘ich saylovlarda Bush 8.1 foiz ovoz olgandi. Avval boshdan u respublikachilar partiyasidan prezidentlikka eng munosib nomzodlardan biri bo‘lib hisoblangan edi. Lekin shtatlardagi boshlang‘ich saylovlarda o‘z partiyaviylari ichida yetakchiga aylana olmadi.

Jyeb Bush Floridaning 43-gubernatori bo‘lgan. U bu lavozimda 1999 yildan 2007 yilgacha ishlagan. Kichik Bush AQShning 41-prezidenti Katta Jorj Bushning ikkinchi o‘g‘li, 43-prezident Jorj Bushning ukasi.

Bush oxirgi ikki hafta ichida prezidentlik poygasida o‘z kampaniyasini to‘xtatgan 4-nomzod hisoblanadi.

Virjiniyaning sobiq gubernatori Jim Gilmor 13 fevral kuni poygadan chiqqani haqida ma'lum qildi. Nyu-Hempshirdagi praymerizda u 133 ovoz, Ayovada esa 12 ovoz oldi.

Undan oldinroq, 11 fevral kuni Nyu-Jyersidan bo‘lgan gubernator Kris Kristi va Hewlett-Packard kompaniyasining sobiq rahbari Karli Fiorina ham kurashni davom ettirmasliklari haqida ma'lum qilishgandi.

AQSh prezidentligi uchun saylovlar shu yilning 8 noyabrida bo‘lib o‘tadi. Respublikachi va Demokratlar partiyasining nomzodlari barcha shtatlarda o‘tkazilgan boshlang‘ich saylovlarda aniqlanadi.